Gazmend Muhaxheri: Në LDK po kërkohen ndryshime

Periskopi.com Lajme

Kryetari i Komunës së Pejës Gazmend Muhaxheri duke mos mohuar as pohuar se do të jetë kandidat për të parinë LDK-së, ka theksuar se koha po kërkon ndryshime.

Kanë mbetur edhe një javë, derisa zyrtarisht të dihet kryetari i ri i LDK-së. Këto zgjedhje do të mbahen më 3 gusht, por ende nuk dihen cilët janë të gjithë kandidatët që do garojnë për këtë post. E gjatë kësaj kohe të shumtë janë emrat të cilët lakohen si kandidatë të mundshëm.

Gjatë ditës së djeshme ish-zëvendësministri i Administrimit të Pushtetit Lokal, Bajram Gecaj, në një postim në Facebook kishte lënë të kuptohet se kryetari i Komunës së Pejës, Gazmend Muhaxheri mund të jetë nja kandidat për kryetar të Lidhjes Demokratike të Kosovës. Në këtë postim ai kishte shkruar se “Diçka po zihet”, mirëpo Muhaxheri thotë se ditëve në vijim do të sqarohet situata.

Muhaxheri thotë se ka shumë kandidatë të mirë në garën për të parin e Lidhjes Demokratike të Kosovës dhe sipas tij koha po kërkon ndryshime.

“Po besoj që ditët në vijim do të sqarohet situata në LDK dhe atë se kush do të jetë kryetar. Me siguri opinionit publik do të informohet shumë shpejt, për kandidatët e mundshëm dhe normal i takon Kuvendit të Lidhjes Demokratike, që të zgjedh kryetarin. Nuk e di unë se kush e meriton, zakonisht e meritojnë ata që janë më të mirët, kemi shumë të mirë në garën e Lidhjes Demokratike. Si dihet koha po kërkon ndryshime, e shohim ditëve vijuese, ata që kandidojnë edhe ata që do të zgjedhin”, thotë Muhaxheri.

I pyetur se a kanë biseduar për koalicione paraprake me partitë tjera politike, Muhaxheri thotë se LDK-së i mbetet një herë të zgjedh kryetarin dhe sa i përket vijave të kuqe, thotë se ai personalisht nuk ka për asnjë parti.

“Është shumë herët që të bisedohet për koalicione. Është hera e parë që duhet me zgjedh kryetarin, e pastaj koalicionet e mundshme qeverisëse. Unë për askënd, unë jam për të zhvilluar politikën me ata që e kanë besimin e qytetarëve, shohim tash varet prej kryetarit të ri, prej krejt politikave që kanë me u zgjedh”, thekson Muhaxherri.

Janë disa emra që tash e sa ditë lakohen si kandidatë të mundshëm për kryetar të Lidhjes Demokratike të Kosovës. Mirëpo është raportuar se sipas statusit të partisë, çdo kandidaturë do të shpallet më 3 gusht, në ditën kur do të mbahen zgjedhjet, për të parin e kësaj partie