Hasanaj: Avdullah Hoti po tenton ta njollosë organizatën tonë, i kemi dokumentet se ku shkuan 800 mijë euro

Periskopi.com Lajme

Lidhja Demokratike e Kosovës sot ka denoncuar Zyrën e Kryeministrit, për keqpërdorimin e një fondi në vlerë prej mbi 800 mijë eurosh. Shefi i GP të LDK’së, Avdullah Hoti, ka thënë se Zyra e Audimit ka gjetur se Zyra e Kryeministrit, e ka ndarë këtë shumë parash pa asnjë procedurë, para të cilat, i ka ndarë si mjete për organizatën ‘Let’s do it Kosova’, shkruan Periskopi.

Hoti e sqaron këtë problem, duke thënë tutje se ‘pagesat prej 806 mijë eurosh, janë bërë vetëm në bazë të faturave që ka dërguar OJQ –ja’ por që sipas tij ‘mungon raporti për punët që janë kryer’.

“Të gjitha pagesat që arrijnë në 806 mijë eurove, janë bërë në bazë të faturave që ka dërguar kjo OJQ. Nuk ka asnjë raport për punët e kryera nga kjo OJQ. Dhe, shkelja e katërt është se koordinatori i taksforcës, asnjëherë nuk ka raportuar në Qeveri, siç kërkohet me vendimin e Qeverisë mbi themelimin e kësaj taskforce. Edhe me të drejtë, auditori, për shkak të mungesës së raporteve, nuk mund të konfirmohet rregullsia e pagesave prej 816 mijë euro”, ka thënë Hoti sot në konferencë për media, shkruan Periskopi.

Drejtori ekzekutiv i Organizatës Joqeveritare ‘Let’s do it Kosova’, Luan Hasanaj, ka thënë se kjo organizatë posedon gjithë dokumentacion për shpenzimet e fushatës së paraparë.

“Ne posedojmë të gjithë dokumentacionin për të gjitha shpenzimet e fushatës së bashku me transaksionet bankare marrëveshjet me operatorët, pra kemi gjithçka e cila parashihet me ligjet në fuqi”, ka thënë Hasanaj, në një prononcim për Periskopi.

Hasanaj thotë se deklaratat e sotme të shefit të GP të LDK-së, Avdullah Hoti, janë vetëm sa për të fituar poenë politikë.

“Sa i përket deklaratës së Hotit, unë e siguroj që nuk do të mundet asnjëherë të merr poenë politik duke tentuar të njollosë aktivitete të cilat kanë qenë lajmi më i mirë i Kosovës për vitin e kaluar, se sa ka pasur sukses fushata ‘Ta Pastrojmë Kosovën’ e dinë qindra mijëra vullnetarë të cilat për tre muaj kanë marrë pjesë, e dinë të gjithë qytetaret e Kosovës”, ka thënë Hasanaj për Periskopi.

Gjithashtu, Hasanaj ka treguar se ata kanë kërkuar nga Zyra Kombëtare e Auditimit (ZKA) përgjigje për vërejtjet që lidhen me këtë OJQ.

Fushata ‘Ta pastrojmë Kosovën’ kishte filluar me 15 shtator të vitit të kaluar dhe kishte zgjatur tre muaj. Si rezultat i kësaj fushate në Kosove janë larguar mbi 900 deponi të mbeturinave./Periskopi/