Telashe për FIFA-n – Japonia heq dorë nga organizimi i Botërorit për klube

Japonia i ka komunikuar zyrtarisht FIFA -s se heq dorë nga organizimi i Kupës së Botës për Klube 2021, i programuar për t’u zhvilluar nga data 9 deri më 19 dhjetor.

Në bazë të vendimit, i cili i ndërlikon në mënyrë të konsiderueshme planet për turneun, masat kufizuese për parandalimin e përhapjes së mëtejshme të pandemisë, e bën të pamundur praninë e publikut në stadiume e për rrjedhojë kufizon ndjeshëm edhe të ardhurat për për organizatorët.

Vendi nipon një muaj më parë organizoi Olpimpadën “Tokyo 2020”, i shtyrë një vit nga pandemia, event që ka shkaktuar një gropë të madhe financiare për shkak të kufizimeve dhe mospranisë së publikut.

FIFA-s tani duhet të hartojë shpejt një plan B për të shpëtuar edicionin 2021 të turneut prestigjioz, ku në këtë edicion do të marrin pjesë plot 24 skuadra. Pasi Japonia të largohet nga skena, në fakt, organi më i lartë i futbollit do të duhet të gjejë një vend alternativë, përndryshe do të detyrohet ta anulojë Botërorin për Klube me formulën aktuale e që në dy edicionet e fundit u zhvillua në Katar.