Thyhet bastioni i fundit i rezistencës? Talibanët ngrenë flamurin në Panjshir
Talibanët tashmë kanë marrë kontrollin në të gjithë territorin e Afganistanit, duke ngritur dhe flamurin e tyre në rajonin e Panjshirit, i cili konsiderohej si bastioni i fundit i rezistencës ndaj tyre.
Mijëra militantë morën pjesë në një operacion që zgjati disa ditë në provincën malore të Panjshirit, duke shpallur fitoren ndaj të ashtuquajturve “Luanët e Panjshirit”.
Më herët, xhihadistët kishin “pushtuar” 7 distrikte në këtë rajon, përfshirë dhe kryeqytetin Bazarak, duke lënë pas qindra viktima në luftime.
Ditën e hënë, zëdhënësi i talibanëve, Zabihullah Mujahid doli në një deklaratë për shtyp ku konfirmoi se territori është tashmë i gjithi nën ligjin e Sheriatit.
Ai tregoi se kishin tentuar të negocionin me liderët e rezistencës në Panjshir, por ata kishin refuzuar bisedime dhe për këtë arsye situata përshkallëzoi në luftime.
Zëdhënësi i talibanëve i kërkoi komunitetit ndërkombëtar që t’i ndihmojë ata të rindërtojnë Afganistanin.
Ai u bëri thirrje vendeve që të vazhdojnë ndihmën humanitare, ndërsa u përpoq të të siguronte afganët se situata në vend do të kthehej në normale ngadalë dhe ekonomia do të përmirësohej. Zëdhënësi i talibanëve ka thënë se fluturimet e brendshme janë rifilluar dhe shton se grupi po pret të shohë kur mund të rifillojnë fluturimet ndërkombëtare.
