Tre burra e trafikojnë një grua në Gjilan, e detyrojnë të kryejë marrëdhënie seksuale me pagesë

Prokuroria Themelore në Gjilan ka kërkuar të caktohet masa e paraburgimit për tre persona të cilët dyshohen për trafikimin e një gruaje, raporton Express

Tre të dyshuarit gjenden nën masën e ndalimit 48 orësh, ndërkaq ndaj tyre rëndojnë veprat penale “Trafikimi me njerëz” dhe “Shërbimet seksuale të viktimës së trafikimit”

Prokuroria ka bërë të ditur se të pandehurit B.H. dhe B.A. në disa lokacione të ndryshme në Gjilan e kanë trafikuar viktimën A.H., që t’iu ofrojë shërbime seksuale me pagesë personave të ndryshëm.

“Sipas kërkesës ekziston dyshimi i bazuar se të pandehurit B.H. dhe B.A., në disa lokacione të ndryshme në komunën e Gjilanit, për qëllime të shfrytëzimit seksual kanë trafikuar të dëmtuarën A.H., ashtu që e njëjta të ofroj shërbime seksuale me pagesë personave të ndryshëm”, thuhet në njoftimin e Prokurorisë.

Me këto veprime të njëjtit dyshohen se kanë kryer veprën penale ‘’Trafikimi me njerëz’’.

Ndërkaq i pandehuri H.B. dyshohet se ka kryer veprën penale “Shërbimet seksuale të viktimës së trafikimit”.