Tre të therur, në dy raste të ndryshme, në Prishtinë

Periskopi.com Lajme

Tre persona janë therur me thikë në dy raste të ndryshme gjatë ditës në Prishtinë.

Rasti i parë ka ndodhur në lagjen e spitalit derisa rasti tjetër në rrugën “Muharrem Fejza”.

Kështu bëri të ditur për Klankosova.tv Agron Borovci, zëdhënës i policisë për rajonin e Prishtinës.

Borovci tha se i lënduari është dërguar për trajtim në Qendren Klinike dhe Universitare të Kosovës.

Ai theksoi se policia i ka ngritur dyshimet tek dy persona të cilët kanë ikur nga vendi i ngjarjes.

“Rreth orës 14:00 është raportuar për një therje me thikë të ndodhur në një lokal në lagjen e spitalit në Prishtinë. Menjëherë pas marrjes së informacionit policia ka dalë në vendin e ngjarjes dhe nga të dhënat e para dyshohet për një person të lënduar nga mjeti i mprehtë ( thikë) i cili është transferuar në QKUK për trajtim të mëtejmë mjekësor. Aktualisht policia ka ngritur dyshimet për dy të dyshuar të implikuar në rast, të cilët kanë ikur nga vendi i ngjarjes ndërkohë që është iniciuar një hetim me qëllim sqarimin e rrethanave të rastit” – tha Borovci.

Zëdhënësi i policisë për rajonin e Prishtinës Agron Borovci, shtoi se tek rasti i dytë i cili ka ndodhur në rrugën “Muharrem Fejza” janë therur dy persona.

Borovci tha se një person i cili dyshohet se është i përfshirë në rast është shoqëruar për në stacionin policor, derisa të plagosurve iu është ofruar tretmani mjekësor.

“Rreth orës 18:00 është raportuar për një therje me thikë të ndodhur në rrugën “Muharrem Fejza” në lagjen Mati në Prishtinë. Menjëherë pas marrjes së informacionit policia ka dalë në vendin e ngjarjes dhe nga të dhënat e para dyshohet për dy persona të lënduar nga mjeti i mprehtë ( thikë) të cilëve u është ofruar trajtimi mjekësor. Një i dyshuar që dyshohet të jetë i implikuar në rast, është shoqëruar për në stacionin policor. Ndërkohë që policia kq iniciuar një hetim me qëllim sqarimin e rrethanave të rastit”- tha Borovci.