Unitedi s’i bën nder Liverpoolit, City drejt titullit (VIDEO)
Manchester City e ka fituar derbin e madh lokal kundër Manchester Unitedit (2-0) në Old Trafford dhe vazhdon ta ketë në duart e veta fatin për titullin e Ligës Premier.
Jesse Lingard për vendasit dhe Bernardo Silva për mysafirët i patën rastet e para në këtë sfidë, ndërsa në fund të gjysmës së parë një solo aksion të Raheem Sterling e ndali portieri David de Gea.
Pas 45 minutave të para rrjetat heshtën, mirëpo ndryshe ndodhi në fraksionin e dytë, në të cilën u shënuan dy gola.
Bernardo Silva pranoi një top nga Ilkay Gundogan dhe ia doli ta dërgonte topin në skajin e portës për ta zhbllokuar rezultatin (54′).
Menjëherë pas, një rast të mirë e pati Sergio Aguero, i cili dërgoi një gjuajtje me vole nga jashtë zonës dhe e goditi shtyllën.
Fitoren e Citizens e vulosi Leroy Sane duke pranuar një pasim nga Raheem Sterling dhe duke e përfunduar aksionin në mënyrë brilante (66′).
Djajtë e Kuq u përpoqën të bënin diçka në vazhdim duke rrezikuar me Romelu Lukakun, por pa sukses dhe në fund e humbën ndeshjen.
Manchester City është në vend të dytë në tabelë, me një pikë më pak se lideri, Liverpool, mirëpo skuadra e Pep Guardiolas ka një ndeshje më pak të zhvilluar.
Nga ana tjetër, Manchester Unitedi është në vend të gjashtë, me tri pikë larg pozitës së katërt që mbahet nga Chelsea.