Ylli më në formë i Kosovës përgjigjet për Periskopi: “Kurrë nuk do të luaja për Shqipërinë para Kosovës”
Shkodran Maholli është një prej lojtarëve kosovarë që po shkëlqen me formën e tij në javët e para të këtij sezoni me ekipin e tij.
Maholli luan për Silkeborg IF në kategorinë e parë daneze dhe ka arritur t’i shënojë dy gola në tri ndeshjet e fundit. Ai është 26 vjeçar dhe në të kaluarën ka luajtur për ekipe me nam në Skandinavi si Halmstads, Atvidabergs, Hacken dhe Sirius. Po ashtu ai ka qenë pjesë e Suedisë U-19.
Ai bëri emër në futbollin suedez te ekipi i Atvidabergs ku në ligë ia doli t’i shënonte 15 gola në 28 ndeshje.
Së fundi, gjatë kësaj jave ai ia doli të shënonte një supergol nga gati 30 metra për ta ndihmuar ekipin e tij që të barazonte si mysafir. Shikoni më poshtë nga minuta 1:52.
Golin tjetër ai e kishte shënuar para dy javësh kundër Nordsjaelland, të cilin mund ta shihni duke klikuar në linkun e mëposhtëm.
Periskopi ka zhvilluar një intervistë me të në prag të ndeshjeve kualifikuese për Euro 2020 me Çekinë dhe Anglinë respektivisht.
Ju keni luajtur për Kombëtaren e Suedisë nën moshën 19 vjeçare. A do të pranonit një ftesë eventuale nga kombëtarja e Kosovës në futboll?
Po, do ta pranoja një ftesë nga selektori Challandes me shumë dëshirë. Unë e dua Kosovën dhe me shumë dëshirë do të luftoja në fushë për ekipin tonë kombëtar.
A jeni kontaktuar ndonjëherë nga drejtues të federatës së Kosovës apo të Shqipërisë?
Jo, deri tash nuk kam pasë asnjë ftesë nga trajneri dhe drejtuesit.
Mes Kosovës dhe Shqipërisë, cilën do të zgjedhnit?
Kosovën, pa fijen e dyshimit. Kurrë nuk do ta zgjedhja Shqipërinë para Kosovës.
A mendoni se mendësia në futbollin skandinav dallon nga mendësia në futbollin ballkanas?
Po, dallon shumë. Në vendet skandinave nuk ka gëzim aq të madh në rast të fitores dhe hidhërim aq të madh në rast të humbjes. Në Ballkan këto përjetohen shumë më rëndë.
Cili mendoni se është lojtari më i mirë i kombëtares së Kosovës?
Mendoj se lojtari më i mirë i kombëtares së Kosovës është Arbër Zeneli.
Ndërkohë, cilin e mendoni si lojtarin më të mirë të kombëtares së Suedisë në të gjitha kohërat?
Mendoj se në këtë rast është Zlatan Ibrahimoviq. /Periskopi
http://www.superliga.dk/video-highlights?fbclid=IwAR3yV5tdubh3Y434g-zuC3e2fW2u5StF4J4HuD1phNcFkU9f5RPzxp9CnW0
