Zelensky zotohet të rimarrë Krimenë nga Rusia

Një bazë ajrore ruse thellë prapa vijës së frontit në Krime është dëmtuar nga disa shpërthime të mëdha, duke e lënë të vrarë të paktën një person.

Nuk ishte menjëherë e qartë nëse ajo kishte qenë shënjestër e një sulmi raketor ukrainas me rreze të gjata. Në fjalimin e tij të natës, presidenti i Ukrainës, Volodymyr Zelensky, nuk diskutoi se kush qëndron pas sulmeve, por u zotua ta “çlirojë” Krimenë, duke thënë – “Kjo luftë ruse kundër Ukrainës dhe kundër gjithë Evropës së lirë filloi me Krimenë dhe duhet të përfundojë me Krimenë – me çlirimin e saj”.

Presidenti rus, Vladimir Putin, e ka aneksuar Gadishullin ukrainas të Krimesë, në mars të vitit 2014.

Shefi i kompanisë shtetërore të energjisë bërthamore të Ukrainës paralajmëroi për rreziqet “shumë të larta” nga granatimet në termocentralin bërthamor të Zaporizhzhia në jug të pushtuar nga Rusia dhe tha se është jetike që Kievi ta rimarrë kontrollin mbi objektin në kohë për dimër. Shefi i Energoatom, Petro Kotin, i tha Reuters në një intervistë se granatimet ruse të javës së kaluar i kishin dëmtuar tre linja që e lidhin uzinën e Zaporizhzhia me rrjetin ukrainas dhe se Rusia dëshiron ta lidhë objektin me rrjetin e saj.

Sipas operatorit ukrainas Energoatom, forcat ruse që e kanë pushtuar centralin bërthamor të Zaporizhzhia po e riorientojnë prodhimin e energjisë elektrike të uzinës për t’u lidhur me Krimenë, e aneksuar nga Moska në vitin 2014. “Për ta bërë këtë, së pari duhet t’i dëmtoni linjat e energjisë të centralit të lidhur me sistemin energjetik të Ukrainës. Nga 7 deri më 9 gusht, rusët kanë dëmtuar tashmë tri linja elektrike. Për momentin, uzina po funksionon vetëm me një linjë prodhimi, e cila është një mënyrë jashtëzakonisht e rrezikshme e punës”, tha presidenti i Energoatom, Petro Kotin për televizionin ukrainas. Centrali, i vendosur jo shumë larg gadishullit të Krimesë, ka gjashtë nga 15 reaktorët e Ukrainës dhe është i aftë të furnizojë energji për katër milionë shtëpi.

Liderët e Estonisë dhe Finlandës duan që vendet evropiane ta ndalojnë lëshimin e vizave turistike për qytetarët rusë, duke thënë se ata nuk duhet të jenë në gjendje të bëjnë pushime në Evropë, ndërsa qeveria ruse kryen luftë në Ukrainë. Kryeministrja e Estonisë, Kaja Kallas, shkroi të martën në Tëitter se “ta vizitosh Evropën është një privilegj, jo një e drejtë njerëzore” dhe se ishte “koha për t’i dhënë fund turizmit nga Rusia tani”, raportoi Associated Press.

Presidenti amerikan Joe Biden nënshkroi të martën dokumente që mbështesin pranimin e Finlandës dhe Suedisë në NATO, zgjerimi më domethënës i aleancës ushtarake që nga vitet 1990, ndërsa ajo i përgjigjet pushtimit rus të Ukrainës, raporton Reuters.

Departamenti Amerikan i Shtetit ka miratuar ndihmë në vlerë prej 89 milionë dollarësh për të ndihmuar Ukrainën të pajisë dhe trajnojë 100 ekipe për t’i pastruar minat tokësore dhe municionet e pashpërthyera për një vit, raportoi Reuters.

Numri i përgjithshëm i anijeve transportuese të grurit për t’u larguar nga portet ukrainase sipas një marrëveshjeje të ndërmjetësuar nga OKB për ta lehtësuar krizën globale të ushqimit ka arritur tani në 12, me dy anijet e fundit që u nisën të martën drejt Stambollit dhe Turqisë.

Enklava Baltike e Rusisë e Kaliningradit ka qenë duke luftuar me kuotat e vendosura nga BE për mallrat e sanksionuara që mund të importojë në të gjithë Lituaninë nga Rusia kontinentale ose Bjellorusia, pranoi guvernatori i rajonit. Lituania e zemëroi Moskën në qershor duke e ndaluar tranzitin tokësor të mallrave si betoni dhe çeliku në Kaliningrad pasi sanksionet e BE-së mbi to hynë në fuqi, raportoi Reuters.

Rusia e ka lansuar një satelit iranian nga Kazakistani mes shqetësimeve se mund të përdoret për mbikëqyrjen e fushëbetejës në pushtimin e Ukrainës nga Moska. Irani ka mohuar që sateliti Khayyam, i cili u dërgua në orbitë në bordin e një rakete Soyuz të lëshuar nga kozmodromi Baikonur, do të jetë ndonjëherë nën kontrollin rus. Por ëashington Post raportoi më parë se Moska i tha Teheranit se “planifikon ta përdorë satelitin për disa muaj, ose më gjatë, për ta përmirësuar mbikëqyrjen e objektivave ushtarake” në Ukrainë, sipas dy zyrtarëve amerikanë./The Guardian