Hoti: 100 eurot nuk e zgjidhin problemin e rritjes së çmimeve, duhet të merren masa afatgjate

Sipas tij, sado e dobishme mund të duket nuk e zgjidh problemin e çmimeve e as nuk përfshin bujqit dhe të papunët.

“Vendimi i sotëm reflekton varfërinë e politikave fiskale dhe sociale të Qeverisë për të mbrojtur standardin e jetës së familjeve. Kjo ndihmë e njëhershme prej 100 euro, sado e dobishme, nuk e zgjidh problemin e rritjes së çmimeve. Për më tepër, kjo ndihmë nuk përfshinë mijëra të papunë dhe ata që merren me bujqësi”, tha ai.

Sipas tij, duhet ndërmarrë masa afatgjate, të cilat tha se i kanë propozuar kur filloi të shfaqet kriza.

Ai ka përmendur pesë masa, ndër to edhe tërheqjen e një shume të kursimeve pensionale.

“1. Nuk është dashur të rritet çmimi i energjisë. 2. Duhet të indeksohen përfitimet pensionale dhe sociale për normën e inflacionit të çmimeve të produkteve ushqimore bazike. 3. Duhet të rriten subvencionet në bujqësi. 4. Duhet të rritet paga minimale. 5. Duhet konsideruar tërheqjen e një shume të kursimeve pensionale”, shtoi Hoti.

Qeveria e Kosovës, sot ka marr vendim që të ndajë 100 euro shtesë për të gjithë pensionmarrësit për muajin prill – pension bazik, pension kontributpagues, pension për aftësi të kufizuar, pension të veteranit. 100 euro për 300 mijë punëtorët e sektorit privat. 100 euro për 80 mijë punëtorët e sektorit publik. 100 euro për 80 mijë studentët. 40 mijë pako ushqimore për familjet në nevojë. Rreth 800 mijë qytetarë përfitues – çdo familje. /PERISKOPI/