A është Rexhep Qosja njeriu që Kurti e do si president të vendit?

Periskopi kishte raportuar qysh në muajin korrik se plani i LDK-së ishte të merrte pozitën e kryetarit të shtetit dhe t’i linte kësisoj rrugën çelë Albin Kurtin për t’u bërë kryeministër.

Kjo parti politike doli e dyta në zgjedhjet e 6 tetorit, dhe i dhuroi menjëherë pozitën e kryeministrit z.Kurti, i cili i kishte vetëm 7 mijë vota më shumë se znj.Vjosa Osmani, kandidate për kryeministre. I pari 183 mijë ndërsa e dyta 176 mijë.

 

View this post on Instagram

 

Në shtëpinë e tij që dukej se do të rrëzohet nga pesha e librave të shumtë, mbrëmë ia uruam 83 vjetorin e lindjes akademik Rexhep Qosjes. Kontributi i tij i paçmueshëm për gjuhën dhe letërsinë tonë e bëjnë atë figurën personifikuese të albanologjisë. Angazhimi i tij politik e diplomatik, gjithnjë kombëtar e progresist, janë kulturë e tij. Ka shkruar shumë, por edhe më shumë do të shkruhet për të. Mbase një ditë edhe libri me titullin “Nga Jeronim De Rada te Rexhep Qosja”.

A post shared by Albin Kurti (@albinkurti_) on Jun 26, 2019 at 2:29am PDT

Iu kujtojmë se në vitin 2014, Isa Mustafa ishte bërë kryeministër me shumë më pak vota se z.Hashim Thaçi, i cili po në bazë të asaj marrëveshjeje për Qeverinë Mustafa, ishte bërë president i vendit.

Por, tashmë hesapet kanë ndryshuar. Kryeministri i ri do të jetë Albin Kurti, ndërkohë që LDK-ja po insiston në idenë fillestare, që Isa Mustafa të jetë i pari i shtetit më 2021, kur i përfundon mandati z.Thaçi, president aktual i vendit, shkruan Periskopi.

Por, kush do të duhej të ishte president i Kosovës sipas Vetëvendosjes?

Në një prononcim të dhënë sot për Klan Kosova, deputetja grua më e votuar e Vetëvendosjes, Albulena Haxhiu deklaroi se presidenti i vendit nuk duhej të ishte as nga Vetëvendosja, por as nga LDK-ja. Ky post – sipas saj – duhej t’i takonte një personaliteti unifikues për vendin.

Rexhep Qosja është një ndër personalitetet më të vlerësuara në Kosovë nga z.Albin Kurti, kryetar i Vetëvendosjes dhe nga anëtarët e tjerë të partisë së tij.

Por, Qosja në fakt nuk ka qëndrime të mira me Lidhjen Demokratike të Kosovës, e të cilët i ka sulmuar shpesh lidhur me qëndrimet e tyre politike në vitet dhe dekadat e fundit.

Iu kujtojmë se në qershor të këtij viti, Kurti e kishte himnizuar veprën e z.Qosja për ditëlindjen e tij, madje duke dhënë idenë për titullin e një vepre që do të quhej “Nga Jeronim De Rada te Rexhep Qosja”. /Periskopi