A është shkarkimi i AKI-së i koordinuar mes Hotit dhe Osmanit? Presidentja jep pëlqimin

Kjo u bë e ditur sot me anë të një komunikate për media nga zyra e kryeministrit.

“Kryeministri i Republikës së Kosovës, z. Avdullah Hoti, i ka kërkuar z. Kreshnik Gashi, lirimin e detyrës së drejtorit të Agjencisë Kosovare për Inteligjencë (AKI)”, u tha në komunikatë.

Pra, siç vërehet, nuk janë dhënë arsyet e një kërkese të tillë nga Hoti, se a bëhet fjalë për thyerjen e kasafortës në presidencë apo për përformancën e tij.

E sipas ligjit për AKI-në, procedurat për shkarkimin e drejtorit të AKI-së janë të qarta.

Pika 4 e nenit 5 të këtij ligji e thotë qartë se shkarkimi i drejtorit të AKI-së ndodhë në të njëjtën formë që ndodhë edhe emërimi.

“5.4 Drejtori i AKI-se shkarkohet nëpërmjet procesit të njëjtë me të cilin është emëruar”, thuhet aty.

Pra, drejtori i AKI-së emërohet nga kryeministri dhe presidenti,  dhe në të njëjtën formë edhe shkarkohet.

“5.3 Presidenti i Republikës së Kosovës së bashku me Kryeministrin, emërojnë së bashku Drejtorin e AKI brenda njëzet (20) ditësh pune nga dita kur pozita mbetet e lire”, thuhet në pikën 3 të nenit 5 të Ligjit për AKI-në.

Edhe njohësi i çështjeve juridike Ehat Miftaraj e thekson se tanimë nevojitet edhe pëlqimi i Vjosa Osmanit për shkarkimin e Kreshnik Gashit, gjithmonë nëse ky i fundit paraprakisht nuk jep dorëheqje.

“Tash mbetet edhe 50% e vendimit te U.D. se Presidentes, znj. Osmani apo e jep edhe ajo pelqimin e saj per shkarkimin e Drejtorit te AKI-se, gjithmone nese i njejti nuk jep doreheqja nga pozita. Shkarkimi nuk mund te ndodh pa pelqimin e perbashket te Presidentit dhe Kryeministrit”, ka shkruar Miftaraj në Facebook.

Lajmi.net ka pyetur edhe në zyrën e u.d të presidentes Osmani në lidhje me atë se a ka pasur koordinim për çështjen në fjalë me kryeministrinë, dhe është në pritje të një përgjigjeje nga kabineti i presidencës.