A po dështojnë zgjedhjet në Veri: KQZ konfirmon për Periskopin se vetëm PDK është çertifikuar

Edhe pasi janë bërë 8 ditë që nga hapja e afatit për certifikim për pjesëmarrje në zgjedhjet që do të mbahen në katër komunat veriore, Komisioni Qendror i Zgjedhjeve (KQZ)  ka pranuar vetëm një aplikim, shkruan Periskopi.

Persikopi ka kontaktuar me KQZ’në dhe i kanë thënë se deri me tani ka aplikuar vetëm Partia Demokratike e Kosovës (PDK), e cila ka paraqitur aplikimin për kryetar të këtyre katër komunave.

“Deri më tani kemi pranuar aplikimin e një subjekti politik për t’u certifikuar për pjesëmarrje në këto zgjedhje. Bëhet fjalë për partinë politike Partia Demokratike e Kosovës, e cila ka paraqitur aplikimin për kryetar të këtyre katër komunave”

Ndërsa, afati i fundit për subjektet politike dhe kandidatët që të aplikojnë për t’u certifikuar për pjesëmarrje në Zgjedhjet e Jashtëzakonshme në këto katër komuna është data 18 prill.

Shpallja e zgjedhjeve të jashtëzakonshme erdhi pas dorëheqjes që dhanë, në fund të nëntorit të 2018’ës, kryetarët e katër komunave më veri, si protestë ndaj vendimit të Qeverisë së Kosovës për vendosjen e taksës 100% për mallrat që vijnë nga Serbia dhe Bosnje Hercegovine./Periskopi