Agron Bajrami i Kohës së Surroit propozohet ambasador në kryeqytetin e BE-së?

Periskopi.com Lajme

Më shumë se katër muaj më parë, Ministria e Punëve të Jashtme dhe Diasporës, shkarkoi 13 ambasadorë në shtete të ndryshme. Mes tyre, edhe ambasadorët në kryeqendrat botërore Bruksel, Uashington, Londër e Tokio. Periskopi merr vesh nga burimet në institucione se emri i propozuar për ambasador në Bruksel, është gazetari i njohur i Kohës & KTV-së, z.Agron Bajrami.

Mungesa e ambasadorëve të rinj në disa shtete e sidomos në kryeqendrat botërore, është kritikuar shumë pasi Qeveria Kurti, përkatësisht Ministria e Punëve të Jashtme dhe Diasporës, shkarkoi 13 ambasadorë.

Në kohën kur janë mbajtur dy takime mes kryeministrit Albin Kurti dhe Aleksandër Vuçiqit, në Brukel, Kosova nuk kishte ambasador në kryeqendrën evropiane, në Bruksel.

Ministria e Jashtme ditë më parë i ka konfirmuar medias kosovare se ka përfunduar të gjitha procedurat për emërimin e ambasadorëve të ri.

Periskopi ka mësuar nga burimet brenda institucionit, se gazetari Agron Bajrami që ka punuar një kohë të gjatë në Grupin Koha, është emri i propozuar për ambasador në Bruksel. Redaksia jonë ka provuar ta kontaktojë z.Bajrami përmes telefonit, por ai nuk është përgjigjur.

Kujtojmë se Grupi Koha njihet si medium pro partisë në pushtet, Lëvizjes Vetëvendosje. Një nga themeluesit e saj, z.Veton Surroi po ashtu ishte përfolur një kohë të gjatë si emër i mundshëm i kryediplomatit kosovar, në Qeverinë Kurti, ani pse një gjë e tillë nuk kishte ndodhur. Mesazhet mbështetëse të themeluesit të Kohës, z.Surroi, ishin vënë në shënjestër të kritikës dhe ironisë, sidomos ai për ‘çlirimin e dytë të Kosovës’, ku Surroi vendoste një paralele të fitores së Vetëvendosjes me çlirimin e vendit nga regjimi i Sllobodan Millosheviqit.