Alarm nga institucioni i Komisionit Evropian: Ushqim për foshnja i kontaminuar me bakterin e rrezikshëm Bacillus Cereus është shpërndarë edhe në Kosovë

Sipas njoftimit zyrtar të RASFF-it, produkti “infant food” është prodhuar në Holandë dhe është shpërndarë në vende të ndryshme të Bashkimit Evropian (BE), si dhe në rajonin e Ballkanit, përfshirë Kosovën dhe Maqedoninë e Veriut, raporton Periskopi.

Nga analizat laboratorike të kryera në Holandë, është konstatuar prania e bakterit Bacillus Cereus në nivel prej 580 cfu/gr.

Megjithatë, Agjencia e Ushqimit dhe Veterinarisë në Kosovë (AUV) ende nuk ka njoftuar nëse ky produkt është prezent në tregun kosovar.

Sipas Ligjit për Ushqimin (Nr. 08/L-120), Agjencia e Ushqimit është e obliguar të informojë menjëherë konsumatorët në rast rreziku. Neni 6 i këtij ligji përcakton qartë se “në rast të rrezikut nga ndonjë ushqim, Agjencia ka për obligim ta njoftojë publikun, institucionet shtetërore dhe palët e interesit”.

Bacillus Cereus është një bakter gram-pozitiv anaerob që prodhon toksina. Ai gjendet zakonisht në tokë, bimë dhe ushqime të ndryshme. Ky bakter zakonisht shkakton sëmundje gastrointestinale, të shoqëruara me simptoma si të vjella dhe diarre, të cilat shfaqen 1 deri në 6 orë pas konsumimit të ushqimit të kontaminuar.

Po ashtu, Bacillus Cereus mund të shkaktojë infeksione serioze te personat me sistem imunitar të dobësuar, duke përfshirë septiceminë dhe endoftalmitin, të cilat në raste të rënda mund të çojnë deri në humbje të shikimit.

Ky bakter lidhet ngushtë me prodhimin e ekzoenzimave intestinale dhe ekstraintestinale që dëmtojnë indet. Toksinat e sekretuara përfshijnë katër hemolizina, tre fosfolipaza të ndryshme, një toksinë emetike (që shkakton të vjella) dhe proteaza./Periskopi/