Albulena Haxhiu e pranon më në fund se s’do të mund të shkojë në SHBA: E shtyem shkaku i situatës

Ministrja e Drejtësisë, Albulena Haxhiu ka pretenduar se bashkarisht me Shtetet e Bashkuara të Amerikës, kanë vendosur që vizita e saj të shtyhet për një kohë më të përshtatshme. Lidhur me anulimin e kësaj vizite, fillimisht ka raportuar sot Periskopi.

Haxhiu në Facebook, pas raportimeve të mediave, ka bërë një reagim duke thënë se të mërkurën pati një diskutim me “zyrtarë të lartë të Ambasadës së SHBA-së”, rreth ftesës së tyre për vizitë.

“Sot pasdite jam takuar me zyrtarë të lartë të Ambasadës së SHBA-ve në Kosovë. Ndër të tjera, diskutuam edhe rreth ftesës së tyre për vizitë në SHBA. Marrë parasysh situatën aktuale politike në vend, bashkërisht kemi konsideruar se duhet ta shtyejmë për një datë më të përshtatshme vizitën”, ka thënë ajo.

E siç ka raportuar Reporteri, në një takim me gazetarë, sot ambasadori Hovenier ka thënë se ministrat nuk është mirë të udhëtojnë jashtë vendit në kohë krize.

Ai ka thënë se ata duhet angazhuar brenda vendit.

Hovenier, duke u përgjigjur në pyetjen lidhur me vizën për ministren Haxhiu, ka thënë se nuk e sheh të vështirë që një ministër të marr vizë amerikane, por tani për tani, për shkak të krizës pas ngjarjeve në veri, nuk është koha më e duhur që ministrat të udhëtojnë për në SHBA për takime zyrtare.

“Ne aktualisht jemi në një krizë, dhe është pikëpamja jonë që, ne jemi tejet të përqendruar në këtë krizë, besojmë që edhe kjo qeveri është e përqendruar në këtë krizë, dhe mendojmë se nuk është koha mbase domosdoshmërisht më e duhura që ministrat të jenë duke udhëtuar për në ShBA për takime zyrtare duke e pasur parasysh krizën të cilën duhet trajtuar këtu. Dhe këtë po ua komunikojmë zyrtarëve të ndryshëm në qeveri”, ka thënë Hovenier.