Analistët e shohin si shkelje të parimeve ndërrimin e statutit nga VV

Dorëheqjen nga posti i kreut të partisë ia kërkonte pikërisht statuti i partisë së tij, të cilin për këtë çështje ai vendosi që ta ndryshonte duke na kujtuar veprimin e presidentit turk Rexhep Taip Erdoan në Turqi, kur vendosi që ta ndryshonte krejtësisht sistemin politik në shërbim të pushtetit personal.

Ndërkohë për njohësit e çështjeve politike, ndërrimi e statutit të partisë shihet si shkelje e parimeve politike.

Analisti, Imer Mushkolaj në një bisedë për Periskopin ka thënë se Vetëvendosje është thirrë vazhdimisht në parime, në mbajtjen e vazhdueshme të tyre edhe pse kësaj here nuk e bënë një gjë të tillë.

“Vetëvendosje vazhdimisht është thirrë në disa parime që nuk i ndërron dhe të cilave iu përmbahet, kështu që statutin e VV-së e kanë ba vet anëtarët e Vetëvendosjes, vet kjo parti, dhe aty e kanë vendos nenin që na tregon ose na kushtëzon që kur kryetari i partisë bëhet kryeministër të largohet nga posti i kryetarit të partisë, por po duket që nuk po e shohin tash të mirëqenë. Prapë une realisht po thirrem në parimet që i përmend shpesh VV e që po duket se kjo puna e ndërrimit të statutit nuk ka të bëjë me parime”, ka thënë ai.

Tutje Mushkolaj ka thënë se Albin Kurti dhe VV e kanë provuar se çfarë pasoja shkakton ndërrimi i kryetarit të partisë dhe sipas tij ndërrimi i statutit i ofron Kurtit siguri në postin e kryeministrit.

“Kurti dhe VV e kanë provuar se çfarë do të thotë kur do të ndërrohet kryetari i partisë edhe rrjedhimisht se çfarë probleme shkakton çështja e kryetarit të partisë me ndamjen e 12 deputetëve atëherë që iu bashkuan PSD’së dhe për këtë shkak besoj unë zoti Kurti po dëshiron qëtë jetë i sigurt në pozitën e tij si kryeministër”, ka thënë Mushkolaj.

Analisti po ashtu ka deklaruar se parimet për Vetëvendosjen herë vlejnë, herë nuk vlejnë për ta.

Ndërsa politologu, Shkodran Ramadani për Periskopin ka thënë se për të ndërrimi i statutit të VV’së ka qënë i pritur dhe jobefasues.

“I pritur dhe aspak befasues, sidomos pas ndarjes së Vetëvendosjes dhe anëtarëve të VV’së që tanimë janë [në] PSD, edhe pas triumfit të Albin Kurtit në zgjedhjet e fundit ai ka mbërritur në një pozicion ku është i pakontestueshëm brenda partisë sepse ndarja e ka ndalë një farë procesi të  heterogjenizmin brenda VV’së dhe tash është e pamundur me dal dikush prej partisë me sfidu Albin Kurtin”, ka thënë Ramadani.

Sipas tij në VV askush nuk ka dashur të sfidohet dhe ta kenë fatin e njetjtë më ish kryetarin e VV’së, Visar Ymerin siç thotë Ramadani “me e përdor si kukull kryetarin e partisë, duke e ditur se Kurti është figura më e madhe”.

Tutje Ramadani ka thënë se askush në VV “nuk don me u mat me Albin Kurtin”.

“Partia nuk mundet me u mat me Albinin, partia nuk mundet me e nxjerrë asnjë kalibër asnjë person që me udhëheq me VV’në. Do me thanë nuk durojnë pluralizëm dhe mendim ndryshe, dhe kjo është evidente tek partitë populiste dhe totalitariste”, ka thënë ai.

Mungesa e demokracisë së brendshme është një mangësi e madhe nga e cila vuajnë të gjitha partitë politike në Kosovë./Periskopi/Sh.Beqiri