Brenda 10 minutave grabiten dy institucione financiare në Prishtinë, policia në gjumë

Sipas informacioneve të policisë së Kosovës, brenda 10 minutave, në kryqëzimin e rrugës “Bill Clinton”, dhe të rrugëve “Edmond Hoxha” dhe “Hajrullah Abdullahu”, brenda 10 minutash janë kryer dy vjedhje.

Agron Borovci, zëdhënës i policisë së Kosovës për rajonin e Prishtinës ka treguar se në ora 10:30 ka ndodhur një vjedhje në filialin e një institucioni financiar për transferta ndërkombëtare.

Në këtë rast dyshohet të ketë qenë i përfshirë një person i armatosur.

“Rreth orës 10:30 është raportuar për një grabitje të ndodhur në filialin e një institucioni financiar për transfere ndërkombëtare në kryqëzimin e rrugëve “Edmond Hoxha” dhe “Hajrullah Abdullahu” në Prishtinë . Pas marrjes së informacionit policia ka dalë në vendngjarje dhe bazuar në informacionet e para dyshohet që grabitja të jetë kryer nga një person i cili po ashtu dyshohet të ketë qenë i armatosur. Policia ka iniciuar një hetim lidhur me rastin dhe ka nisur me ndërmarrjen e veprimeve të nevojshme policore me qëllim zbardhjen e rastit”, ka deklaruar Borovci.

Edhe grabitja te “Bill Clintoni”, Borovci ka thënë se bazuar në informacionet e para dyshohet se grabitja është kryer nga një person.

“Rreth orës 10:40 është raportuar për një grabitje të ndodhur në filialin e një institucioni financiar për transferta ndërkombëtare në kryqëzimin e rrugën “Bill Klinton” në Prishtinë. Policia  ka dalë në vendngjarje dhe nga informacionet e para  dyshohet që grabitja të jetë kryer nga një person. Policia ka filluar hetimet bashke me ndërmarrjen e veprimeve të nevojshme policore me qëllim ndriçimin e rastit”, ka thënë Borovci.

Mbrëmë, në rrugën “Eqrem Qabej”, është kryer një vjedhje tjetër e një filiali të bankës që gjithashtu ishte grabitje e armatosur.