Cili ishte kurthi presidencial i Vetëvendosjes me emrin e Murat Jasharit?

Në muajin korrik të vitit të kaluar, Periskopi kishte raportuar për herë të parë se Vetëvendosje dhe Lidhja Demokratike e Kosovës, do ta negocionin postin e Presidentit pas zgjedhjeve të 6 tetorit 2019. Ashtu ndodhi.

Më shumë se 100 ditë nga zgjedhjet e 6 tetorit, VV dhe LDK nuk kanë arritur një marrëveshje që do t’i bënte bashkë në Qeveri. Gjërat u prishën edhe më shumë, kur Vetëvendosje në mënyrë të njëanshme propozoi kandidatin për kryetar të Kuvendit dhe LDK-ja e votoi. Por, të kthehemi te posti i Presidentit.

LDK insiston që të arrihet marrëveshje mes dy partive edhe për këtë post nën arsyetimin se kështu do të formohej një Qeveri me jetëgjatësi – të paktën – 4 vjeçare, duke qenë se mandati i Presidentit aktual ‘skadon’ pas më shumë se një viti. Vetëvendosje do që ky post të negociohet kur t’i kalojë mandati Presidentit aktual. Por, edhe sikur ta pranonte negocimin e një posti të tillë tash, Vetëvendosje kërkon diçka nga Lidhja Demokratike: emrin e Presidentit.

LDK inisiston që të mos e thotë emrin e kandidatit për President menjëherë, por premton se ‘ai do të ishte një figurë unifikuese’. VV insiston: kush është ai? (Kujtojmë këtu deklaratën e z.Kurti se ‘LDK po e kërkon postin e Presidentit por e ka një figurë fantome/joekzistente për këtë post’). Të kthehemi sërish te kërkesa e Vetëvendosjes për ‘emrin e Presidentit’.

Lëvizja Vetëvendosje insiston se posti i Presidentit të negociohet pas më shumë se një viti, por që ai emër, të ishte një figurë unifikuese. Raportimet në media përgjatë këtyre 100 ditëve, shpërthyen me informata të ndryshme. Njëra nga to, Periskopi merr vesh se është mëse e vërtetë: se Vetëvendosje e do Murat Jasharin për President.

Sipas burimeve të Periskopit, Vetëvendosja synon ‘të godasë’ me këtë emër në disa drejtime: Murat Jashari (i Familjes Jashari) do të ishte një figurë e pranuar edhe për opozitën e tashme, e cila përbëhet nga partitë kryesore që njihen si ‘krahu i luftës’, e pse jo edhe për vetë LDK-në. Nëpërmjet kësaj ‘figure unifikuese’, VV-ja do të krijonte një pushtet absolut, atë që partneri i saj i mundshëm – LDK – i druhet që tani, në rast se VV s’do ia jepte LDK-së këtë post. (Kujtojmë thelbin e kërkesës së LDK-së për VV-në: pushtet të balancuar, e jo absolut).

Me Murat Jasharin President, me këtë ‘figurë unifikuese’, VV do të synonte shtrirjen e pushtetit institucione ku Presidenti ka kompetenca si: në Agjencionin Kosovar për Inteligjencë, emërimet dhe dekretimet e gjyqtarëve dhe Kryeprokurorit të Shtetit, emërimet në FSK, formimi i misioneve diplomatike dhe emërimi i diplomatëve, emërimi i kryetarit të KQZ-së, emërimi i Guvernatorit të BQK-së.

Kjo mësohet të jetë arsyeja e këmbënguljes së LDK-së në kërkesën e saj kryesore për një koalicion të mundshëm me VV-në: pushtet të balancuar. /Periskopi/