Çka fshehë Qeveria, kallëxon Norvegjia: Dy njoftime totalisht të ndryshme nga takimi Kurti – Støre në Oslo

Kryeministria e Kosovës në faqen e saj zyrtare, ka njoftuar për takimin e Kurtit me homologun e tij norvegjez sot në Oslo, z.Jonas Jonas Gahr Støre.

Komunikata e Qeverisë së Kosovës, flet për tema që janë diskutuar si zhvillimi ekononik, edukimi, mirëqenia sociale etj. Por nuk flet për atë se çka në të vërtetë tha kryeministri norvegjez në takim me Kurtin.

E ajo çka në të vërtetë duket se i interesoi homologut norvegjez të Kurtit, është dialogu me Serbinë – çështje të cilën komunikata e Qeverisë tonë, nuk e përmend thuajse fare.

Qe një pjesë nga komunikata e Qeverisë së Kosovës:

“Kosova e sheh Norvegjinë si shembull se si mund të ndërtohet një shoqëri e drejtë dhe me prosperitet duke investuar në edukim, mirëqenie sociale dhe tash në ekonomi të gjelbër, u shpreh kryeministri Kurti. Të tre këto janë prioritete edhe të Qeverisë sonë, tha kryeministri dhe duke marrë parasysh edhe indikatorët pozitivë në ekonomi, por edhe ata në demokraci, është koha që të thellojmë bashkëpunimin dhe rrisim lidhjet tona ekonomike, shtoi më tej kryeministri Kurti”, citojmë komunikatën e Qeverisë.

“Në takim, gjithashtu u diskutua për rëndësinë e raporteve të mira fqinjësore ndërmjet shteteve të Ballkanit Perëndimor, si dhe për invazionin dhe agresionin e paprovokuar ushtarak rus në Ukrainë, të cilin e dënuan ashpër të dy kryeministrat”, thuhet në njoftimin e Qeverisë.

 Por, me çka tingëllon në të vërtetë i ashpër kryeministri norvegjez nga takimi me Kurtin?

Komunikata e Qeverisë norvegjeze, nis me titullin me shkronja mjaft të mëdha:

“S’mund ta marrim stabilitetin e Ballkanit Perëndimor si të mirëqenë (të garantuar)”

Të shkojmë më tutje te komunikata e Qeverisë norvegjeze:

 “Bisedimet mes dy kryeministrave ishin të fokusuara në mbështetjen e Norvegjisë lidhur me dialogun e ndërmjetësuar nga Bashkimi Evropian, midis Kosovës dhe Serbisë”, citojmë komunikatën e Qeverisë norvegjeze. 

Pra, kryeministri norvegjez, nuk ka folur vetëm për ‘raporte të mira fqinjësore ndërmjet vendeve të Ballkanit Perëndimor, siç na njofton Qeveria jonë, por flet saktësisht për dialogun që duhet të përfundojë dhe me këshillën që në Ballkan ‘të mos ndezet zjarri sërish’.

 “Ne s’mund ta marrim stabilitetin në Ballkanin Perëndimor si të mirëqenë (të garantuar). Çështjet e pazgjidhura që datojnë nga fundi i viteve të 90-ta, mund ta ndezin zjarrin në rajon sërish”, citohet t’i ketë thënë Kurti, homologu norvegjez  z. Store.

“Kjo mund të zgjidhet vetëm përmes dialogut midis Kosovës dhe Serbisë. Marrëveshjet ekzistuese duhet të implementohen dhe të dyja palët duhet të ruhen nga retorika që mund të humbë besimin mes tyre”, vazhdon tutje komunikata e qeverisë norvegjeze.

Pjesa që Qeveria e Kosovës e fshehë totalisht:

“Gjatë këtij takimi, shpreha zhgënjimin tim lidhur me vendimn e Kosovës për të mos lejuar zgjedhjet e Serbisë më 3 prill, siç janë organizuar në të kaluarën”, ka thënë Store./Dafina Demaku/ Periskopi/