Deklarata e analistes së It’s My Love pasi dhunohet konkurrentja, është thjesht neveritëse dhe alarmuese

Ky emision në parim pretendohet se ka për qëllim të bashkojë njerëz dhe çifte, por në fakt krejt çka bën është të promovojë banalitet, ekspozim të personave të mitur, ekspozim të personave që potencialisht mund të kenë nevojë për trajtime profesionale shëndetësore si dhe së fundmi për ta kulmuar turpin, promovoi dhunën, shkruan Periskopi.

Në episodin e fundit, njëra prej konkurrenteve sulmon fizikisht, derisa godet shuplakë tjetrën pasi kjo i drejtohet me ‘mshele’.

Zonjusha në fjalë qartazi ka probleme me menaxhim të frustrimit, gjë për të cilën natyrisht se duhet të konsultohet me ndonjë ekspert, por jo para se të trajtohet si rast fillimisht nga policia e Kosovës.

Sidoqoftë, ajo që është edhe më shqetësues dhe që definitivisht është alarmues për mirëqenien e konkurrentëve aty është reagimi i drejtuesit të emisionit, Valon Maloku dhe analistes Antigona Kotorri.

Zotëri Maloku, ndër të tjerash, vazhdimisht mban anën e agresores duke e nxjerr madje fajtore viktimën pasi i ka thënë agresores fillimisht ‘mshele’ dhe se kjo nuk ka të drejtë t’ia ndalë lirinë e shprehjes të cilën ‘e ka të garantuar me kushtetutë.’

Oh Zot i madh… na jep durimin. Sinqerisht, për një njeri normal dhe me logjikë të shëndoshë është e pamundur ta shikojë komplet episodin pa pësuar trauma psikologjike e emocionale.

Viktima fillimisht dhunohet fizikisht, pastaj i bëhet presion konstant psikologjik nga të pranishmit.

Vetëm hidhni një sy deklaratës së analistes me emrin Antigona Kotorri në lidhje me rastin e dhunës, më poshtë:

”Raportet pa konflikte janë raporte pa emocione. Kur ne kemi emocione, atëherë ato edhe eskalojnë.

”Duhen dhe zhgënjehen, për atë mas zhgënjimit vjen edhe dhuna.

”Une e kuptoj Inën (agresoren) për reagimin e saj. Nuk e përkrahi por e kuptoj, sepse Ina sa e di unë për Albanën ka bë shumë, vetë e ka pru këtu, e ka njoftu me mu. E ka end me makinë, u kujdes çka ka me bo e gjëra të tjera.

”Ina nuk arsyetohet që i ka ra (e ka goditë në gjuhën e zonjës), qyshdo që të jetë janë emocionet që kulmojnë në momente të caktume. Por njerëzit kanë pritshmëri, gjithmonë këto reagime vijnë prej pritshmërisë së tepërt.”

Thjesht neveritëse… zonja në fjalë qartazi bën tentativa dëshpëruese, për arsye krejtësisht të panjohura, ta minimizojë momentin e dhunës duke u munduar ta futë agresoren nën një perde mbrojtëse ‘të eskalimit të emocioneve’ siç e quan ajo.

Janë momente tejet shqetësuese të shikohen, derisa viktima përballet me presion konstant psikologjik, fyerje e nënçmime të vazhdueshme.

Madje, njëri prej konkurrentëve meshkuj e quan person me ‘probleme psikologjike’ viktimën. Ai vërtetë merr fjalën dhe ekspozon të dëmtuarën edhe më shumë, duke tentuar qartazi ta shndërrojë në subjekt paragjykues në audiencë si person me ‘të meta mentale’.

Thjesht është përtej çdo kufiri të mundshëm dhe totalisht e dalë nga kontrolli situata.

Dhunim i viktimës dhe pastaj ushtrim i presionit psikologjik mbi të.

Vështirë se Policia e Kosovës ndonjëherë ka pasur prova më evidente se kaq. Video më të gjatë se një orë të publikuar në një platformë si YouTube dhe aty që ta sheh e gjithë bota, dhunimin dhe aplikimin e stresit të jashtëzakonshëm mbi një bijë e motër, e mbi të gjitha një qytetare të Republikës së Kosovës.

Ju paralajmërojmë, pamjet e mëposhtme janë jashtëzakonisht shqetësuese të shikohen dhe potencialisht mund të shkaktojnë komplikime te personat me probleme me zemër dhe ata që kanë fragjilitet emocional. /Periskopi.com/