Deliu i reagon Haradinajt: Nëse një grua e ka bërë krenare Kosovën – këtë epitet e meriton Vlora Çitaku

Deliu ka thënë për Periskopin se Çitaku është një nga ambasadoret më të mira që ka Kosova dhe se ajo gjithmonë na ka bërë krenar me përfaqësimin në mbledhjet e Këshillit të Sigurimit, dhe jo vetëm.

Tutje Deliu ka deklaruar se, Çitaku si një nga ambasadoret më reprezentative të Kosovës – nuk do të duhej të sulmohej në këtë mënyrë nga askush.

“Mendoj që Vlora Çitaku është një nga ambasadoret më të mira që ka Kosova dhe natyrisht që ajo gjithmonë na ka ba krenar në përfaqësimin e shtetit të Kosovës. Fjalimet e saj në Këshillin e Sigurimit kanë dhënë mesazh të fuqishëm se Vlora është një nga ambasadoret më reprezentative që ka pasur Kosova ndonjëherë”, ka thënë Deliu për Periskopin.

Tutje, ajo ka deklaruar se kryeministri Haradinaj duhet të jap përgjigje se pse e ka implikuar Çitakun në përplasjet e fundit me presidentin Hashim Thaçi.

“Besoj që kryeministri duhet të përgjigjet pse e ka implikuar Zonjën Çitaku në këtë. Por po them që si deputete që jam, mendoj që nëse një grua e ka bërë krenar Kosovën, atëherë këtë epitet me të drejtë ia kisha dhënë Vlora Çitakut. Ajo gjithmonë ka qenë krah i fuqishëm dhe njëra prej përfaqësuesve më të denja që Kosova ka pasur në misione diplomatike, e aq më tepër që ajo ka një mision të rëndësishëm e që janë SHBA’të dhe ka pas rol të jashtëzakonisht në të gjitha takimet ku ka përfaqësuar Kosovën”, ka thënë Deliu tutje për Periskopin.

Ndërkohë, kryeministri i Kosovës, Ramush Haradinaj ka thënë sot nga Deçani se ambasadorja Vlora Çitaku nuk e përfaqëson shtetin e Kosovës në Shtetet e Bashkuara të Amerikës, por presidentin Hashim Thaçi – raporton Periskopi.

Haradinaj ka thënë se është për keqardhje që Kosova nuk e ka një ambasadore të denjë në SHBA.

“Ambasadorja e Kosovës, Vlora Çitaku nuk e përfaqëson Kosovën. Por e përfaqëson Hashim Thaçin atje. Nuk e përfaqëson Kosovën atje”, ka thënë Haradinaj./PERISKOPI