8 orë më parëDitë e kobshme, tre punëtorë ndërtimtarie vdesin brenda pak orësh – ranë nga objektet ku po punonin
Periskopi(një vit më parë)
(një vit më parë)Tre punëtorë të sektorit të ndërtimtarisë kanë vdekur brenda ditës së sotme në Kosovë. Dy kanë vdekur në një vendpunishtë në Gjakovë, ku kanë rënë nga lartësia e një objekti që ka qenë në ndërtim e sipër, e një tjetër në Istog, i cili kishte rënë nga kati i tretë i një objekti para një […]
Dita e sotme ka qenë e kobshme. Brenda pak orëve, kanë vdekur tre punëtorë të ndërtimtarisë,
Rasti i parë ndodhi në Gjakovë, ku dy persona kanë vdekur pasi kanë rënë nga një objekt që ishte në ndërtim e sipër.
Vdekjen e tyre e konfirmoi për Reporteri.net Drejtori i Policisë në Gjakovë, Lumni Graishta.
“Dyshohet se kanë rënë nga lartësia nga një objekt në ndërtim e sipër. Mjeku në emergjencë e ka konfirmuar vdekjen”, tha Graishta.
Më shumë detaje rreth rastit dha pastaj zëdhënësi i Policisë për rajonin e Gjakovës, Sheremet Elezaj, i cili konfirmoi se dy personat që kanë vdekur janë të moshës madhore.
“Sot rreth orës 08:15, jemi njoftuar se dy persona (meshkuj të moshës madhore) janë dërguar për trajtim mjekësor në Spitalin Rajonal në Gjakovë, dyshohet si pasojë e lëndimeve të pësuar në vendin e punës, në rrugën “Bardhyl Qaushi ” në Gjakovë. Më pas është konfirmuar edhe vdekja e tyre. “Njësitë relevante të Policisë kanë dalë menjëherë në vendin e ngjarjes dhe janë duke ndërmarr veprime hetimore me qëllim të sqarimit të plotë të rrethanave të rastit”, ka deklaruar ai.
Për vdekjen e tyre, Prokuroria Themelore e Gjakovës ka ndaluar dy persona për 48 orë.
Ata janë ndaluar për shkak të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
“Brenda afatit të paraparë ligjor, ndaj të njëjtëve do të paraqitet kërkesa për caktimin e masës së paraburgimit. Prokuroria e Shtetit, në koordinim të ngushtë me Policinë e Kosovës, po ndërmerr të gjitha veprimet e nevojshme për zbardhjen e këtij rasti”, deklaroi Prokuroria.
Një punëtor tjetër i ndërtimtarisë ka vdekur në Istog. Ai kishte rënë para një muaji nga ndërtesa ku po punonte. Bëhet fjalë për një 65-vjeçar nga fshati Gurrakoc i Istogut.
Rastin për Reporteri.net e ka konfirmuar zëdhënësi i Policisë për Rajonin e Pejës, Fadil Gashi.
“Ngjarja ka ndodhur në fshatin Gurrakoc të Istogut më 24 qershor, kur viktima kishte pësuar lëndime në vendin e punës. Për shkak të lëndime të rënda, ai fillimisht ishte dërguar në spitalin rajonal të Pejës, e më pas në Qendrën Klinike Universitare të Kosovës. Me urdhër të prokrurorit, trupi i pajetë është dërguar për obduksion në Institutin e Mjekësisë Ligjore”, ka deklaruar Gashi.
Kryetari i Sindikatës së Punëtorëve të Sektorit Privat, Jusuf Azemi, e ka cilësuar situatën alarmante dhe tejet shqetësuese.
Azemi kërkoi nga institucionet përgjegjëse që të veprojnë menjëherë për të ndalur këtë zinxhir tragjedish në vendin e punës.
“Prokuroria ka për obligim të marrë veprime, Policia dhe Inspektorati i Punës po ashtu. Ky vit ka nis si vit i kobshëm,” shtoi ai./Periskopi/
