Dy shpërthime e intervenim i Specialsave: Krejt çka u raportua deri tash nga veriu

Gjatë ditës së sotme, u njoftua se oficerët do të hyjnë në zyra për të pasur akses në listat zgjedhore në veri.

Kosova Online raporton se depërtimi ka ndodhur rreth mesditës dhe se kanë rënë dy shpërthime.

I njëjti portal, referuar informacioneve nga terreni, bën të ditur se punonjësit e KQZ-së kanë ndërruar bravat pasi kanë thyer dyert e zyrave në bashki.

Sirena që ka rënë ka zgjatur për disa minuta dhe mësohet se qytetarët janë mërzitur shumë.

Siç ka konfirmuar për portalin Nova.rs një qytetar nga Zubina Potok, në një moment para ndërtesës së komunës kanë arritur pesë vetura, tre prej të cilave xhipa të njësive speciale dhe dy automjete të rregullta policore.

Në momentin që efektivët e KQZ-së po largoheshin nga bashkia, forcat speciale kanë zbritur nga automjetet e tyre dhe janë siguruar që të mos ndodhin incidente të mëdha.

Më pas ka rënë sirena e alarmit.

Menjëherë pas kësaj, forcat speciale dhe zyrtarët u larguan nga kjo komunë.

Portali Nova.rs ka tentuar të kontaktojë me drejtuesit e kësaj komune, por deri në publikimin e këtij teksti askush nuk iu përgjigj thirrjeve.

Petkoviq: Kurti dërgoi policinë në komunën e Zubin Potokut, me qëllim që të pushtojë me dhunë

Drejtori i Zyrës së ashtuquajturës për Kosovë, Petar Petkoviq, ka reaguar pasi anëtarët e Komisionit Komunal Zgjedhor në Zubin Potok, të shoqëruar nga policia e Kosovës, hynë në objektin e Komunës së Zubin Potokut.

Petkoviq ka thënë se Albin Kurti ka dërguar policinë në objektet e komunës së Zubin Potokut në veri të Kosovës dhe po tenton me forcë të përgatisë terrenin për mbajtjen e zgjedhjeve të tij të paligjshme.

“Bëhet fjalë për demonstrimin më brutal të forcës dhe provokimin e tensioneve dhe provokimeve të reja nga ana e Prishtinës, e cila po përpiqet të zbatojë masat e saj të paligjshme, të paligjshme dhe të njëanshme përmes dhunës dhe masave të njëanshme dhe të shkaktojë një destabilizim të ri të situatës në terren“, tha Petkoviq.

Siç vlerësoi ai, Kurti këtë e ka caktuar dhe e ka drejtuar në kohën kur në Tiranë po mbahej samiti BE-Ballkani Perëndimor, ashtu si edhe gjatë samitit të Berlinit bëri thirrje për shembjen e Marrëveshjes së Brukselit dhe arrestimin e Nenad Gjuriqit.

“Kështu duket e ashtuquajtura demokraci dhe shtet i së drejtës së Aljbin Kurtit – ndërsa serbëve u ndalon të marrin pjesë në zgjedhje dhe referendume, në të njëjtën kohë, me tyta të gjata, me pushkë përpiqet të mbajë zgjedhje në veri të krahinës. Është e qartë se qëllimi i Kurtit është të marrë me dhunë dhe armë katër komuna serbe në veri të Kosovës dhe Metohisë dhe të vendosë përfaqësues shqiptarë në to në zgjedhje ilegale dhe jolegjitime”, tha Petkoviq.

Ai u bëri thirrje serbëve që të qëndrojnë të qetë dhe të mos bien në provokime.

“Qëllimi i tyre i vetëm është të shkaktojnë konflikte dhe kriza në veri të Kosovës dhe Metohisë, sepse populli ynë dëshiron vetëm respektimin e të drejtave dhe marrëveshjeve, të drejtën për të qëndruar dhe për të mbijetuar në vatrat e tyre shekullore”, tha Petkoviq.