18 minuta më parëEmri i Dardan Sejdiut për nënkryetar të Prishtinës shkakton përplasje në PDK
Periskopi(4 vite më parë)
(4 vite më parë)Burime në PDK, i thonë Periskopit se emri i Dardan Sejdiut për pozitën e nënkryetarit të komunës së Prishtinës, ka shkaktuar pakënaqësi të mëdha në parti. Kjo, pasi fillimisht për këtë post, u përfol emri i Blerand Stavilecit, ish-ministër dhe ish-deputet i PDK-së e më pas ai i Dardan Sejdiut, që nuk është pjesë e […]
***
Në fillim të këtij muaji, kryetari i Prishtinës Përparim Rama, bëri të ditur se ka arritur marrëveshjen e koalicionit për qeverisje me PDK-në në Prishtinë.
Sipas saj, Partisë Demokratike, përveç disa drejtorive, do t’i takonte edhe posti i nënkryetarit të komunës së Prishtinës. Emri i përfolur për këtë post, ishte Blerand Stavileci.
Por ditëve të fundit, Periskopi merr vesh se në qarqet e PDK-së në qendër të partisë dhe të degës në Prishtinë, po lakohet edhe emri i Dardan Sejdiut, ish-deputetit të Vetëvendosjes dhe ish-kandidatit të PSD-së për deputet.
Sipas burimeve të Periskopit në PDK, ka disa figura në qendër të degës së partisë në Prishtinë, që kanë rekomanduar Dardan Sejdiun për pozitën e nënkryetarit ndërkohë që në qendrën e partisë, emri më i mundshëm për postin ishte Blerand Stavileci.
Burimet i kanë thënë Periskopit se me emrin e Sejdiut për pozitën e nënkryetarit kanë shprehur pakënaqësi edhe figura të rëndësishme të PDK-së që udhëheqin degë të fuqishme të kësaj partie nëpër qytete të ndryshme të Kosovës.
“Anashkalimi i z.Stavileci që ka një histori të gjatë të kontributit në parti, përballë z.Sejdiu që ende as nuk është anëtar i partisë tonë, do të shkaktonte telashe në parti”, i tha një burim Periskopit.
Blerand Stavileci ishte shef i ish-kryeparlamentarit Kadri Veseli.
Ai ka udhëhequr ministri gjatë qeverisjeve të PDK-së me vendin, si atë të Zhvillimit Ekonomik e më vonë edhe Ministrinë e Bujqësisë.
Dardan Sejdiu e ka filluar karrierën politike në FER, për të kaluar më pas në Vetëvendosje e së fundmi në PSD, prej ku dha dorëheqje. Ai ka qenë nënkryetar i Prishtinës me qeverisjen e Shpend Ahmetit.
Në kohën sa ishte deputet i Vetëvendosjes, ishte kritik i madh i ish-liderëve të PDK-së, Hashim Thaçit e më vonë Kadri Veselit.
Gjatë fushatës së fundit të zgjedhjeve lokale në Kosovë, z.Dardan Sejdiu është përmendur si njeriu që qëndronte prapa udhëheqjes së fushatës së Uran Ismailit, ish- kandidatit të PDK-së për Prishtinën, por një gjë e tillë nuk u konfirmua asnjëherë.
Sa i përket komunës së Prishtinës, kujtojmë që para pak ditësh kryetari Përparim Rama, ka bërë të ditur emrat e drejtorëve të drejtorive që do t’i udhëheq LDK-ja. /Periskopi
