Era zgjedhje: VV mbledh qytetarët me autobusë për ‘ta festuar Vitin e Ri’ nesër në Prishtinë

Nëpërmjet një mesazhi që ka arritur në adresën e redaksisë tonë, Lëvizja Vetëvendosje do të mbajë tubim në sallën 1 Tetori në Prishtinë, të enjten, më 28 dhjetor 2023.

Sipas mesazhit, Vetëvendosja ka organizuar sjelljen e qytetarëve nga qytete të ndryshme të Kosovës edhe me autobusë.

‘I dashur anëtar,

Me kënaqësi ju ftojmë të merrni pjesë në festën përmbyllëse të vitit 2023 dhe kremtimin e vitit të ri 2024, të organizuar nga Lëvizja VETËVENDOSJE! në sallën 1 Tetori në Prishtinë, të ejten me datë 28 dhjetor, në ora 19:00.

Nisja e organizuar me autobus bëhet në ora 16:45 nga Zyrja e LLV-Gjakovë’, thuhet në mesazhin që ka arritur në redaksinë tonë.

Duke qenë që autobusi – është mjeti transportues që kur përmenden partitë politike, karakterizon kryesisht fushatat zgjedhore në Kosovë, për bartjen e qytetarëve nga vendi në vend, Periskopi ka pyetur zëdhënësin e Vetëvendosjes, z.Arlind Manxhuka për këtë organizim.

Në fillim, ai na tha se ‘nuk e kupton relevancën e pyetjes’ por më pas, tha se VV i ka mbi 60 mijë anëtarë dhe ‘duhet organizim i veçantë për t’i njoftuar’.

“Ju e dini se Lëvizja Vetëvendosje i ka mbi 60 mijë anëtarë dhe për me i njoftu dhe me i organizu gjithë këta duhet organizim i veçantë”, tha z.Manxhuka për Periskopin.

Rikujtojmë se zgjedhjet e reja, ka një kohë që përmenden.

Kryeministri Albin Kurti, shquhet për deklaratën se nuk do t’i donte ato, sepse ‘do të zhdukej opozita’ dhe ‘kjo nuk do t’i konvenonte Qeverisë’.

Ndërkohë, në një shkrim autorial, gazetari Baton Haxhiu paralajmëroi në fundjavë se ‘Kurti i do zgjedhjet në gusht të vitit 2024’.

Zgjedhjet po i përmend edhe opozita. Nënkryetarja e PDK-së, znj.Vlora Çitaku, në një prej reagimeve të fundit, rreth një sondazhi që u publikua në Debat Plus, shkruan kështu:

“Kryeministër, nëse je vërtetë i kënaqur me sondazhet, hajde shkojmë në zgjedhje. Edhe ashtu, prej korrikut të kemi lutë me e shpërnda Kuvendin. Çohu shkojmë në zgjedhje, edhe e merr vesh tamam se qysh i ke numrat edhe sa janë të kënaqur qytetarët me qeversijen tënde, e cila do të shkoj n’histori si më e dështuara ndonjëherë!”/Periskopi