Faton Peci pesë orë para Prokurorisë Speciale për fabrikën e mbetjeve shtazore, krejt çka u tha

Për pesë orë Peci u mor në pyetje si i pandehur nga organet hetuese, përcjell Periskopi.

Përvec tij, për intervistim u mor edhe Drejtori Ekzekutiv i Agjencisë së Ushqimit dhe Veterinarisë, Bekim Hoxha.

Lidhur me aksionin në Ministrinë e Bujqësisë ka reaguar ministrja në detyrë e Punëve të Jashtme, Donika Gërvalla.

Ajo e ka cilësuar si “inskenim të gërditshëm” aksionin e Prokurorisë, të udhëhequr nga Blerim Isufaj ndaj Pecit.

“Kur pikërisht ata që e kanë për detyrë ta mbrojnë shtetin ligjor dhe qytetarët e Republikës nga krimi i keqpërdorin organet e drejtësisë për hakmarrje dhe për të njollosur figurat e suksesshme dhe të pastra politike, atëherë asgjë më nuk duhet të na habisë”, shkroi Gërvalla në Facebook.

Ndërsa Albulena Haxhiu nga Vetëvendosje tha se “ka plan për dëmtim” të figurës së Faton Pecit.

Pikërisht për këtë edhe kryetari i Lidhjes Demokratike të Kosovës, Lumir Abdixhiku tha që guximi i prokurorëve kundër korrupsionit po lind.

“Edhe në Kosovë, sikurse në secilin vend tjetër në Evropë, do të del një ditë një prokuror a dy, djem e vajza të reja e të rinj, që kanë guxim e integritet të trajtojnë secilin akt korruptiv; secilën hajni. Edhe atë të pushtetarëve. Sidomos atë të pushtetarëve”, tha Abdixhiku.

Atë ditë do të mburremi të gjithë – me shtetin tonë, me arritjet tona; me integritetin e njerëzve që i shërbejnë popullit të tyre pa frikë. Atë ditë, piskamat e politikanëve që mbrojnë hajninë vetëm pse hajni është i tyre – atë që u bërtet me fakte mu para syve – atë ditë, këto piskama nuk do të kenë më asnjë vlerë”, shtoi ai.

Ndërsa deputeti i Aleancës për Ardhmërinë e Kosovës, Bekë Berisha, është shprehur në humor duke përdredhur moton zgjedhore të Vetëvendosjes “cep më cep”.

“Cep em cep ! Cent em cent ! Deri në pecin e fundit!”, shkroi ai.

Nga Partia Demokratike të Kosovës akuzuan ministrin Peci se ka shkelur Ligjin për Pronën Publike, ku parashihet që pronat publike të jepen me qira vetëm përmes ankandit publik dhe atë jo më shumë se për 15 vjet, përveç në rastet kur merret vendim në Kuvend.

“Ministria e Bujqësisë, nën drejtimin e ministrit Faton Peci, dhe me aprovimin e Kryeministrit Albin Kurti, ka finalizuar një ndër marrëveshjet më të dëmshme dhe skandaloze për interesin publik, dhënien me qira të një impianti publik me vlerë mbi 10 milionë euro për vetëm 30 mijë euro në vit, për një periudhë 20 vjeçare, ndërkohë që kompania përfituese përfiton subvencione mbi 3.2 milionë euro në vit”, tha ai.

Intervistimi i Pecit dhe aksioni i PSRK-së tek Ministria e Bujqësisë – Gjithçka që dihet deri më tani