Feronikeli – Milan: Lajm fantastik për fansat, ulet në mënyrë drastike çmimi i biletave

Është përfolur shumë për çmimet e larta të biletave për ndeshjen miqësore mes Feronikelit dhe Milanit, që do të zhvillohet më 10 gusht në “Fadil Vokrri”.

Të gjithë ishin të ngazëllyer për ardhjen e “Rossonerëve”, por fansat shpejt u zhgënjyen pasi u publikuan çmimet e larta të biletave, shkruan Periskopi.

Mirëpo, i ftuar në një emision në “Klan Kosova”, organizatori i ndeshjes, Agron Selimi ka dhënë lajmin e madh për uljen e çmimit të biletave.

“Lajm interesant për publikun është se kemi biseduar shumë çështjen e çmimeve para ndeshjes, jam në bisedime me promotorin e ndeshjes,” tha ai.

“Prej sot kemi marrë vendim që loja të zhvillohet sipas planit, por do të kemi çmime tjera.

“Bileta që kishte kushtuar më herët 35 euro, tani do të kushtojnë 15 euro, biletat e 50 eurove tani kushtojnë 35 , kurse biletat e 115 eurove kushtojnë 89 euro.”

Lajm tjetër i mirë është se ata që tashmë i kanë blerë biletat me çmimet e vjetra, e kanë mundësinë të rimbursohen dhe këtë mund ta bëjnë duke shkuar në pikat e shitjes.

Për më shumë, Selimi tha se legjendat e klubit italian, Paulo Maldini dhe Boban gjithashtu do të jenë pjesë e kontigjentit që do të zbarkojë në Prishtinë. /Periskopi.com/