Gecaj: Xhavit Haliti ka frikë nga FARK’u, po e sulmon për qëllime politike e klanore

Zyrtari i LDK-së, Bajram Gecaj iu është kundërpërgjigjur Xhavit Halitit, i cili mbrëmë në një emison në TV Dukagjini ka thënë se FARK-u nuk ka ekzistuar

Xhavit Haliti mbrëmë ka folur për luftën e UÇK-së si dhe betejen e Kosharës, derisa ka thënë se FARK-u nuk ka ekzistuar fare, raporton Periskopi.

“Në territorin e Kosovës nuk ka argument që ka pas FARK. Ka pas oficer të ish-ushtrisë jugosllave të shkolluar në ushtrinë jugosllave që kanë hyrë në Kosovë me idenë për të luftuar dhe i ka quar Ahmet Krasniqi. Ata kanë qenë tri grupe oficerësh. Njërin grup i ka komanduar Ahmet Krasniqi, tjetrin Bujar Bukoshi dhe një grup tjetër e ka komanduar Nik Gjeloshi”, ka thënë mbrëmë Haliti në ‘Debat Plus’ me Ermal Pandurin në RTV Dukagjini.

E sot, Bajram Gecaj, zyrtar i LDK-së me anë të një postimi në Facebook iu është kundërpërgjigjur pretendimeve të Halitit për FARK-un.

Gecaj ka thënë se Haliti ka frikë nga FARK-u dhe se e tërë kjo po bëhet për qëllime politike e klanore.

Më poshtë e keni postimin e plotë të Gecajt:

FARK-ofobia!

Është interesant që sapo të ngritët çështja e Forcave të Armatosura të Republikës së Kosovës (FARK), deputeti i PDK-së dhe ish aktivist i LPK-së, Xhavit Haliti, na paraqitet vazhdimisht si njëri nga më të zëshmit në nxjerrjen e ofendimeve, pezmit e vrerës në lidhje me këtë formacion, i cili përbëhej nga njësitet më profesioniste dhe më së miri të organizuar të luftës sonë çlirimtare. Duke mohuar ekzistencën e këtyre forcave, të përbëra nga ekspertë të profesionit dhe nga shumë atdhetarë e patriotë të cilët i ishin bashkuar luftës çlirimtare të rreshtuar rreth institucioneve legjitime të Republikës së Kosovës, si nga brenda vendit ashtu edhe nga diaspora, Haliti tenton të përvetësoi dhe të ri-orientoi historinë tonë të lavdishme drejt interesave individuale, parciale e klanore. Si nuk i bren ndërgjegje këta njerëz se po ofendojnë gjithë këtë armatë luftëtarësh, aktivistësh e patriotësh, çdoherë kur shtrembërojnë faktet, kur mohojnë dhe ofendojnë gjakun e tyre të dredhur për liri, pavarësi e demokraci, duke lënduar kështu jo vetëm luftëtarët në fjalë, por edhe ndjenjat e familjarëve të tyre dhe popullit të Republikës së Kosovës në përgjithësi, të cilët sot gëzojnë lirinë që na solli mundi, djersa dhe gjaku i këtyre atdhetarëve. E kjo, fatkeqësisht, bëhet kryekëput për arsye të pastra politike dhe me qëllim të përvetësimit të padenjë e të pa-dinjitetshëm të fryteve të një lufte epike çlirimtare e gjithëkombëtare! Faktet dhe të vërtetën nuk do të mund t’i mohoi, anashkaloi apo t’i shlyej bash asnjeri nga ne. Historinë nuk do të mund ta shkruajnë akterët e këtyre ngjarjeve, por këtë do të bëjnë gjeneratat e reja të historianëve modern e profesionistë!. /Periskopi/