Gërxhaliu tregon kur ishte përplasur me palën serbe për të pagjeturit: Iu thash s’jeni në Prishtinë që të lëshoni vula

Ish-drejtori i Institutit të Mjekësisë Ligjore të Kosovës (IMLK), Arsim Gërxhaliu, në emisionin “Real Talk me Maxhunin”, i cili transmetohet në Periskop dhe T7 ka folur si është organizuar transporti i personave të zhdukur nga varrezat masive në Serbi.

“Në pikën kufitare në Merdare kanë qenë dy tenda të mëdha të cilat i ka rregulluar UNMIK-u dhe aty e kemi pasur shkëmbimin qoftë edhe kur ka pasur persona serbë të identifikuar në Kosovë me qese, në kufi aty e kemi pasur pranim dorëzimin. Pastaj unë me veturë kam shkuar mbrapa kamionit prej Serbisë me përcjellje të Policisë deri në kufi. Aty tek ato tenda bëheshim dy komisionet bashkë, UNMIK-u, Kryqi i Kuq Ndërkombëtar dhe e bënim pranim dorëzimin të dokumentacionit të rasteve”, tha ai.

Gërxhaliu ka treguar edhe rastet e personave të zhdukur që janë zhvarrosur  tre ose katër  herë.

“Psh i kanë vrarë në Mehë i kanë i kanë zhvarrosur i kanë marrë i kanë dërguar atje i kanë varrozur i kanë sjellë pas luftës pala serbe i kanë dërguar në shpella, pastaj janë sjellë në Kosovë dhe janë varrozur për herë të tretë ose katër”, tha ai.

Ai e ka bërë të ditur edhe për një moment jo të mirë me të cilin ishte ballafaquar në Surqinë, dhe kacafytjen me një prokurorë në Rudnicë.

“Ka pasur momente të vështira edhe ngritje të zërit. Momenti që nuk e harroj është dashur të shkoj urgjentë për shkak të arritjes së disa analizave dhe kontrollit para se të sjellen tek ne dhe protoklli e parashihte që gjithqysh të jem atje. Edhe, UNMIK-u vendosi që të më dërgoi me helikopter në Surqinë. Unë shkova atje një shqiptar i sjellur me helikopter fort nuk iu pëlqej filluan do provokime, disa gjëra, ma mbyllën në një hapësirë. Zgjati kjo procedurë 60 minuta deri sa ndërhyri diplomacia ndërkombëtare edhe më liruan”, ka treguar Gërxhaliu.

Ai ka treguar edhe arsyen se pse iu bë ndalesa nga Serbia, duke iu përgjigjur edhe me ironi palës serbe për humbjen e Kosovës.

“Kinse unë kam qenë në disa trajnime në Amerikë pas luftës i panë vulat e Amerikës, Anglisë, Gjermanisë. Nuk ki vulë dalëse nga Jugusllavia më thanë. Unë iu thash që nuk kam faj që nuk jeni në Prishtinë të më lëshoni vula. Aty nisi reagimi i tyre dhe provokimet.  Edhe me një prokuror kemi pasur kacafytje kur dolën eshtrat në Rudnicë në ndërtesën e ndërtuar mbi pjesë kockore. Kanë qenë disa gjëra por të kalueshme “, ka treguar Gërxhaliu./Periskopi/