Gjykata Kushtetuese miraton masën e përkohshme të kërkuar nga Lista Serbe

Brenda Kushtetueses për Nacionalen kanë bërë me dije se vendimi për miratimin e masës është marrë sot.

I njëjti burim ka treguar se vendimi do të publikohet sot gjatë ditës.

Kjo masë ka për qëllim që të ndalë rrjedhën e afatit prej 30 ditësh në procesin e konstituimit të Kuvendit, afat ky që është caktuar në aktgjykimin e dytë të Gjykatës Kushtetuese në lidhje me konstituimin e Kuvendit.

Javën e kaluar, Lista Serbe ka dorëzuar kërkesë të re në Gjykatën Kushtetuese, duke e kontestuar mënyrën se si është zhvilluar procesi i zgjedhjes së nënkryetarëve të Kuvendit nga radhët e komuniteteve jo-shumicë.

Në këtë parashtresë, subjekti politik serb ka kërkuar që votimi të kthehet në pikën fillestare dhe të zhvillohet si një proces i unifikuar, pra në formë “pakete”, në përputhje me praktikat e mëhershme parlamentare.

Gjithashtu, në kërkesën e saj partia serbe ka kërkuar vendosjen e një mase të përkohshme nga Kushtetuesja, me arsyetimin se rrezikohet rrjedhja e afateve ligjore për formimin e qeverisë së re.

“Të caktojë, duke pasur parasysh interesin publik, masën e përkohshme, me të cilën do të ndalojë veprimet e mëtejshme kundërkushtetuese të Kryetarit te Kuvendit, në mënyrë që të mos zgjidhet Qeveria kundërkushtetuese ose të fillojnë të rrjedhin afatet për zgjedhjen e Qeverisë së Kosovës, për shkak se moscaktimi i masës së përkohshme do të shkaktonte dëme të pariparueshme dhe potencialisht do të çonte në formimin e institucioneve kundërkushtetuese, duke cenuar kështu rendin juridik dhe demokratik në Kosovë.”, është thënë në kërkesë.

Në dokumentin që ka siguruar KALLXO.com, Lista Serbe pretendon se kryetari i Kuvendit ka shkelur nenin 67 të Kushtetutës, si dhe disa dispozita të Rregullores së Punës së Kuvendit.

Sipas kërkesës së Listës Serbe, shkelja kryesore lidhet me faktin se kryetari i Kuvendit fillimisht u ka dhënë mundësinë komuniteteve të tjera jo-shumicë për të propozuar kandidatin për nënkryetar, ndonëse Kushtetuta dhe Rregullorja përcaktojnë qartë se e drejta e parë e propozimit i takon komunitetit serb.

“Kryetari i Kuvendit ka shkelur kompetencat e tij dhe se ai, në kundërshtim me Kushtetutën dhe Rregulloren e Punës së Kuvendit, së pari i ka ftuar komunitetet e tjera jo-shumicë të bëjnë propozimin, edhe pse në Kushtetutën dhe Rregulloren e Punës së Kuvendit është përcaktuar qartë se propozimi i parë para komuniteteve jo-shumicë paraqitet nga komuniteti serb.”, është thënë kërkesën e Listës Serbe.

Kjo është lënda e tretë që dërgohet në Gjykatë Kushtetuese në lidhje me konstituimin e legjislaturës së nëntë.

Lëndën e parë e kishte dërguar AAK-ja, kurse lëndën e dytë e kishin dërguar PDK-ja dhe LDK-ja.

Në të dy aktgjykimet e para Kushtetuesja kishte konstatuar shkeljen e Kushtetutës nga kryesuesi i seancës konstituive dhe VV-ja.