Hana në krye të Telekomit, dikur shihej krah Vetëvendosjes nëpër protesta

Më 2016-të, Burbuqe Hana kishte qenë pjesë e protestave të Vetëvendosjes në sheshet kryesore të Prishtinës. Nj fotografi të tillë e kishte publikuar Shqipe Pantina, që tashmë nuk është pjesë e kësaj partie.

Thaçi akuzonte VV’në për ‘dhomën e përgjimeve’ në Telekom sa Hana ishte udhëheqëse

Ishte presidenti i Kosovës, Hashim Thaçi i cili në vitin 2020 kishte bërë akuza të rënda ndaj pushtetit të ri, Vetëvendosjes, duke pretenduar se kishin hyrë edhe në Dhomën e Përgjimeve të Telekomit të Kosovës.

Sipas tij, “për tri ditë rresht, Albin Kurti, Haki Abazi dhe Xhelal Sveçla kishin hyrë në dhomën e përgjimeve.”

Këto akuza ishin mohuar nga Sveçla, derisa në atë kohë Telekomi udhëhiqej nga Burbuqe Hana. Ajo ishte ftuar edhe të dëshmonte për këtë rast në vitin 2020.

Burbuqe Hana ishte emëruar ushtruese e detyrës së kryeshefes së Telekomit më 24 prill 2020, në kohën kur Qeveria Kurti ishte në detyrë.

Njoftimi i plotë i Telekomit:

Me datën 23 dhe 24 nëntor 2022, Komisioni Vlerësues në bashkëpunim me Partnerin zbatues për monitorim, për pozitën Kryeshef Ekzekutiv, në mesin e 18 aplikacioneve të pranuara, pas shqyrtimit dhe vlerësimit të dosjeve/aplikacioneve ka përzgjedhur në listën e ngushtë për intervistim pesë (5) kandidatë

Me datën 05 dhe 06 dhjetor 2022, Komisioni Vlerësues në bashkëpunim me Partnerin zbatues për monitorim të procesit të përzgjedhjes ka intervistuar kandidatët e përzgjedhur në listën e ngushtë për pozitën e Kryeshefit Ekzekutiv të TK Sh.A.

Komisioni në bazë të metodologjisë për vlerësimin e Zyrtarëve të Lartë, të përcaktuar nga Partneri zbatues për monitorim (BDO), ka bërë poentimin e të gjithë kandidatëve të intervistuar, ku znj. Burbuqe Hana është vlerësuar nga Komisioni Vlerësues me më së shumti pikë.

Bordi i Drejtorëve i TK Sh.A. konstaton që i gjithë procesi i rekrutimit për pozitën e punës Kryeshef Ekzekutiv ka qenë transparent, i rregullt dhe në bazë të Ligjit, Kodit të Etikës dhe Qeverisjes Korporative.

Komisioni Vlerësues rekomandon të rishpallet konkursi për ZKFTH

Ndërsa për pozitën Zyrtar Kryesor i Financave dhe Thesarit, kanë aplikuar gjashtë (6) kandidatë. Pas shqyrtimit dhe vlerësimit të dosjeve/aplikacioneve, Komisioni Vlerësues ka konstatuar që nuk ka numër të mjaftueshëm të kandidatëve që i plotësojnë kushtet e përcaktuara me konkurs për ZKFTH, konform legjislacionit në fuqi.

Duke u bazuar në këtë vlerësim, Komisioni Vlerësues rekomandon që të rishpallet konkursi për ZKFTH./PERISKOPI/