36 minuta më parëHistoria e lidhjes së Liburn Aliut me UBT’në daton që nga puna e tij si drejtor në Prishtinë
Periskopi(4 vite më parë)
(4 vite më parë)Ministri i Mjedisit, Liburn Aliu sot njoftoi për nënshkrimin e një marrëveshjeje me kolegjin UBT, aty edhe ku merr një pagë të majme – më shumë se 1000 euro në muaj si profesor. Përveç ministër e profesor Aliut, në nënshkrimin e marrëveshjes shihet edhe shefja e kabinetit të tij, Rineta Jashari – e cila po […]
Liburn Aliu, ministër i Mjedisit, Planifikimit Hapësinor dhe Infrastrukturës është duke e favorizuar hapur kolegjin UBT, nga i cili merr një pagë të majme si profesor. Sikurse sot, më datë 9 shkurt 2017, pronari i UBT’së, Edmond Hajrizi ishte shfaqur në një takim me drejtorin e Drejtorisë së Urbanizmit, Ndërtimit dhe Mbrojtjes së Mjedisit, Liburn Aliu, me të cilin kishin bashkëbiseduar për mënyrat e bashkëpunimit ndërmjet UBT-së dhe Komunës së Prishtinës, për fusha me interes për kryeqytetin, banorëve të saj, studentëve, si dhe stafit në përgjithësi.
Në këtë takim, ndër të tjera, është biseduar edhe për mundësinë për kryerjen e praktikës së studentëve të UBT-së në Komunën e Prishtinës, bashkëpunimi në projekte hulumtuese si dhe në analiza.
Në shtator të vitit të kaluar, ministri Aliu ishte shfaqur krah punëdhënëset të tij në një tjetër eveniment.
Në ambientet e qendrës së UBT-së në Prishtinë, me organizim të Fakultetit të Arkitekturës dhe Planifikimit Hapësinor, UBT kishte mbajtur debatin për projektligjin për Odat e Arkitektëve dhe Inxhinierëve në fushën e ndërtimit.
I pranishëm në këtë debat ishte rektori i UBT-së, Edmond Hajrizi, ministri i Ministrisë së Mjedisit, Planifikimit Hapësinor dhe Infrastrukturës, Liburn Aliu, dekani i Fakultetit Arkitekturë dhe Planifikim Hapësinor në UBT, dr. Lulzim Beqiri, si dhe profesorë të tjerë të UBT-së.
Gjatë këtij debati u diskutua mes rektorit, ministrit dhe të pranishmëve të tjerë për rëndësinë e një ligji të tillë, si dhe për rolin dhe mundësinë që të bëhen përmirësime në këtë projektligj.
Ministria që z.Aliu drejton, sot ka nënshkruar marrëveshje bashkëpunimi me këtë kolegj për kryerjen e disa punëve.
Sot, nënshkruam marrëveshjen që përcakton kornizat e bashkëpunimit institucional në mes të Ministrisë së Mjedisit, Planifikimit Hapësinor dhe Infrastrukturës dhe Kolegjit “UBT”, në fushat e interesit të përbashkët, në pajtim me kompetencat ligjore, për hartimin, aplikimin dhe zbatimin e projekteve, elaborateve dhe studimeve të përbashkëta, hulumtime shkencore, organizimin dhe realizimin e forumeve profesionale, konferencave dhe simpoziumeve shkencore, realizimin e këshillimeve profesionale reciproke, ofrimin e mundësive për realizimin e praktikës profesionale për studentët, harmonizimin e përmbajtjeve mësimore me nevojave e tregut të punës, si dhe funksionalizimin e institucioneve të përbashkëta profesionale dhe shkencore”, njofton Aliu.
Nënshkrimin në marrëveshje e kanë hedhur, ministri Liburn Aliu dhe punëdhënësi i tij tek kolegji UBT, Edmond Hajrizi.
Nënshkrimi i Aliut mund t’i kushtojë me masa nga Agjencia Kundër Korrupsionit për ndonjë konflikt të mundshëm të interesit. Në ueb-faqen këtij kolegji figuron se ministri Aliu është mësimdhënës, dhe merr një pagë në vlerë prej 1128 eurove në muaj.
Në fotografinë që ministria ka publikuar sot, me Aliun shihet që është edhe Rineta Jashari – shefe e stafit të kabinetit të Aliut.
Periskopi ka gjetur se edhe Jashari është ligjëruese në UBT dhe merr një pagë në vlerë prej 800 eurove.
Lidhur më këtë. Periskopi i është drejtuar sot Agjencish Kundër Korrupsionit për të parë nëse ka pasur konflikt të interesit nga ana e zyrtarëve të ministrisë, kur kanë favorizuar kompaninë ku punojnë vetë nën petkun e pushtetit. Nga Agjencia kanë thënë për Periskopin se këto informacione të Periskopit do t’i trajtojnë brenda afatit ligjor. /PERISKOPI/
