Hoxhaj e solli njohjen nga Togo, për tërheqje u njoftuam në kohën e Gërvallës, Gërvalla ia gjuan topin Pacollit

 “Ne në Togo e njohim vetëm një Serbi, atë uniken. Më vjen mirë që e përmendët tërheqjen e njohjes së Kosovës, ajo tërheqje është përfundimtare,” – u shpreh Dussey në Serbi.

Dussey ndërkohë shtoi se pas vizitës së Ivica Daçiqit në këtë shtet, Togoja kishte vendosur të tërhiqte njohjen e Kosovës.

Enver Hoxhaj e solli njohjen më 2014

Ish-ministri i Jashtëm i Kosovës, Enver Hoxhaj dhe homologu i tij togolez, Robert Dussey kishin nënshkruar në Prishtinë marrëveshjen për vendosjen e marrëdhënieve diplomatike mes dy vendeve, pak javë pas njohjes zyrtare që ky shtet i kishte bërë pavarësisë së Kosovës.

Periskopi ka kontaktuar zotëri Hoxhajn, dhe i njëjti është përgjigjur vetëm shkurt.

‘’Po unë e kam sjellë atë njohje’’.

“Njohja nga Togo ka qenë një nga njohjet më të rëndësishme që ka marrë Republika e Kosovës dhe falë vendosmërisë së ministrit Dussey dhe mbështetjes nga presidenti i Togos sot arritëm të vendosim marrëdhënie diplomatike mes Togos dhe Kosovës. Jemi të interesuar me Togon, për të shkuar përtej marrëdhënieve diplomatike”, thoshte Hoxhaj më 2014., duke kërkuar mbështetje të mëtutjeshme për përfundimin e procesit të njohjeve nga vendet e tjera afrikane që ende nuk kanë marrë vendim.

Ministri i Jashtëm i Kosovës kishte bërë të ditur gjithashtu se ishin nënshkruar edhe dy marrëveshje të tjera për bashkëpunimin bilateral ndërmjet Kosovës dhe Togos dhe bashkëpunimin në fushën e ekonomisë, tregtisë dhe arsimit.

Ministri i Punëve të Jashtme dhe Bashkëpunimit të Republikës së Togos, Robert Dussey, kishte deklaruar se Qeveria e Togos ka vendosur që të lobojë te shtetet tjera për njohjen e pavarësisë së Kosovës.

“Pavarësia juaj është e nevojshme, sepse ne besojmë se vendosmëria e njerëzve është për paqen në botë. Me praninë tonë këtu duam të konfirmojmë se Togo është e përkushtuar për të lobuar dhe për të bërë maksimumin për të ndikuar në shtetet që nuk e kanë njohur Kosovën. ta njohin”, tha ministri Dussey.

Gërvalla: Ç‘njohja e Kosovës nga Togo ndodhi në vitin 2019

Ministrja e Jashtme e Kosovës, Donika Gërvalla, ka reaguar pas raportimit për tërheqjen e njohjes së Kosovës nga shteti i Togos.

Përmes një postimi në Facebook, Gërvalla tha se çnjohja nuk ka ka ndodhur tani, por që në vitin 2019.

Pra i bie, në kohën kur kryediplomat ishte Behgjet Pacolli.

“Shumë shkurt, në fund të një dite të ngjeshur me plot takime pozitive për Kosovën dhe rrugën e saj euroatlantike: Të gjithë të ekzaltuarve rreth “ç’njohjes” së Togos dhe propagandës së Daçiçit dua t’iu rikujtoj që ajo ka ndodhur në vitin 2019, pra shumë kohë para se vinte në detyrë kjo qeveri.

Më e pakta që do të duhej të ndodhte pas një propagande të tillë të përsëritur dhe fushatës kundër Kosovës është qëndrimi unik ndaj propagandës së Daçiçit dhe Vuçiçit, jo vetëm rreth “ç’njohjeve. Të dhëmbin sytë kur sheh se sa shumë përjargen disa, sa herë që Sllobo i Vogël përpiqet t’i japë një shqelm Kosovës”, tha Gërvalla./PERISKOPI/