Ideologu i VV-së për kritikat ndaj rritjes së çmimeve: Albin Kurti e bëri Kosovën të pavarur

Ideologu i Vetëvendosjes, Hysamedin Feraj, ka bërë një tjetër reagim të përçudshëm në mbrojtje të kryeministrit Albin Kurti nga kritikat për rritjen e çmimeve në produkte bazë.

Feraj i ka vënë Kurtit edhe meritën e Pavarësisë së Kosovës, por edhe atë të reciprocitetit – premtim të cilin Kurti nuk e ka realizuar asnjëherë tash e shtatë muaj dhe tre ditë në pushtet.

“Shpejt kanë nisë me thënë se pavarësia, reciprociteti dhe dinjiteti i shtetit janë vendosë nga Albin Kurti, por këto nuk hahen dhe qeveria duhet ta lë politikën e t’i zgjidh hallet e përditshme të qytetarëve.” – shkruan Feraj, përcjell Periskopi.

Ata i quan kritikët nga shoqëria civile si “antipolitikë” dhe nostalgjikë “të qëndrimit të urtë ndaj Serbisë”.

Ai ka premtuar se “Republika do të shtrihet edhe nëpër komuna” duke nënkuptuar një fitore të madhe të partisë së cilës i takon.

Statusi i plotë:

Shpejt kaluan katër vjet!

• Shpejt kanë nis me thënë: bukën, qumështin dhe vajin, i kishim më lirë në kohën e Serbisë e të PRONTO mafisë sesa të Albin Kurtit. Lufta kundër kontrabandës, kundër korrupsionit e zhvatjes nuk hahet!

Këta janë nostaligjikët e regjimit të shkuar, ata që kanë shpresuar se meqë idhujt e tyre e kanë bërë, atëherë secili mund të blej një ari tokë me tre euro, ose secili mund ta blej sot me pesë e ta shes nesër me pesëmijë.

• Shpejt kanë nisë me thënë se pavarësia, reciprociteti dhe dinjiteti i shtetit janë vendosë nga Albin Kurti, por këto nuk hahen dhe qeveria duhet ta lë politikën e t’i zgjidh hallet e përditshme të qytetarëve.

Këta janë antipolitikët e shoqërisë “civile”, nostalgjikët e qëndrimit të urtë ndaj Serbisë sepse përndryshe na rritet çmimi i lirisë.

• Shpejt kanë nisë me thënë: pisllëkun e bërë pirg për 20 vite Albini nuk e ktheu menjëherë në prig me ar të pastër.

Këta janë fantazistët që e kanë ngatërrruar Albin Kurtin me Albus Dumbeldorfin, magjistarin e romanit fantastik “Harry Potter”. Sipas deluzionit të tyre, ashtu si Albusi, Albini duhej që me shkopin magjik atë ç’ka premtuar ta bëj për katër vite ta bënte për të katërtën e sekondës. Dhe deluzionin e tyre mund ta vuaj Kosova.

• Fatmirësisht ndërgjegjet e tilla nostalgjike, antipolitike dhe deluzive janë vetëm të zhurmshme sepse zotërojnë medie, por jo aq të përhapura sa ta pengojnë shtetndërtimin e Kosovës.

Republika do të shtrihet edhe në komuna!