Instituti Hidrometeorologjik paralajmëron: Rrezik për vërshime në Kosovë

Reshjet e konsiderueshme të shiut nga 3 deri më 5 janar 2026 kanë shkaktuar rritje të ndjeshme të niveleve të ujit në pjesën perëndimore të Kosovës, veçanërisht në pellgun e Drinit të Bardhë.

Instituti Hidrometeorologjik i Kosovës ka njoftuar se lumenjtë që burojnë nga Alpet Shqiptare, përfshirë Erenikun, Bistricën e Pejës, Bistricën e Deçanit dhe lumin e Istogut, kanë shënuar rritje të theksuar të prurjeve, duke rritur rrezikun për dalje nga shtrati në disa zona.

Sipas të dhënave zyrtare, sasitë më të mëdha të reshjeve janë regjistruar në Junik me 231.5 milimetra, Gllogjan me 151.6 milimetra, Kuqishtë me 130.4 milimetra dhe Radoniq me 124.7 milimetra. Ndërkohë, niveli i lumit Erenik në Gjakovë ka arritur në 3.4 metra, një nga nivelet më të larta të matura gjatë kësaj periudhe.

Autoritetet u kanë bërë thirrje qytetarëve që jetojnë pranë rrjedhave lumore në perëndim të vendit të tregojnë kujdes të shtuar dhe të ndjekin njoftimet zyrtare, duke theksuar se situata kërkon vëmendje të vazhdueshme./Periskopi/