Xhavit Haliti nuk e përjashton koalicionin PDK – Vetëvendosje

Vendimi i Gjykatës Kushtetuese për vlefshmërinë e votës së Etem Arifit, ndërroi komplet lojën e partive politike, ku e tërë ‘lufta’ e zhvilluar rreth postit të presidentit, bëri që të kthehet tash te ajo e kryeministrit.

Garë ndërmjet partive se kush do të jetë i pari në këtë zgjedhje tashmë ka nisur edhe përmes sondazheve, ku së fundmi Besnik Bislimi i VV’së ka prezantuar një që e nxjerr Vetëvendosjen me 55 deputetë.

Ndaj sondazhit të nxjerr nga z.Bislimi kanë reaguar zyrtarë nga parti të tjera, ndërkohë Periskopi sot e ka pyetur Xhavit Halitin e PDK-së se si e komenton këtë sondazh dhe situatën e krijuar pas vendimit të Kushtetueses.

Në një intervistë të shkurtër, z.Haliti, ka thënë se edhe PDK mund ta nxjerr një sondazh që e nxjerr partinë e tij me 75%. Ndërkohë, Haliti nuk e ka mohuar një koalicion të ardhshëm PDK – Vetëvendosje.

Për më shumë lexoni intervistën e plotë:

Periskopi: A do të ishte koalicion i duhur PDK-VV për një qeveri stabile?

Xhavit Haliti: Për  mua qeveri stabile dhe me interes për Kosovën, do të ishte një koalicion i madh, i fuqishëm dhe i përgjegjshëm që ndërton  politika shtetërore, dhe jo politika të lagjeve, jo politika të partive, dhe jo politika të individit, kjo është e domosdoshme tjerat s’kanë aspak rëndësi. Unë nuk e besoj që mund të  krijohet koalicion parazgjedhor mes VV-PDK,  por unë besoj në përgjegjshmërinë e njerëzve që e duan vendin dhe duan ta çojnë përpara dhe jo ta stagnojnë kështu siç ka ndodhur këto 5-6 vitet e fundit, por t’i japin një shtytje rregullimit të shtetit, kjo do të thotë të mos ketë askush vija të kuqe por të kemi dallime në programe, dhe unifikimi në programe, bërja e politikës shtetërore për  qeverisje është shumë e rëndësishme”

Periskopi: Si e komentoni sondazhin e fundit të publikuar nga VV’ja ?

Xhavit Haliti: Edhe ne mund të bëjmë një sondazh dhe ta nxjerrim vetën me 75%, por po besoj që sondazhet që i ka bërë NDI,  që i kanë bërë këto institucionet e pavarura nuk janë të ndikuar dhe nuk bëjnë sondazhe  për elektorat janë më të besueshme, unë nuk  e di realitetin se si janë sondazhet  në këtë situatë por ne do të luftojmë që së pari t’i realizojmë interesat e shtetit, qytetarëve dhe kjo do të duhej të jetë e rëndësishme për të gjithë pastaj kush fiton në qoftë se arrihet me u bë koalicion është mirë, në qoftë se jo ata që fitojnë duhet të jenë të përgjegjshëm për qeverisë në Kosovë.

Periskopi: Cili është pozicioni i PDK’së, në këtë situatë politike por edhe sa i përket postit të presidentit në të ardhmen jo të largët?

Xhavit Haliti: PDK nuk ka ndërruar qëndrim, sepse nuk ka asnjë arsye që të ndërrojë qëndrim, unë mendojë që presidenti do të duhet të zgjidhej, ditën që do të miratohet edhe buxheti i Kosovës në parlament, para se të shpërndahet parlamenti, por e kam të qartë që ky mendim i imi nuk do të vie ne shprehje për arsye që dihet se tani është fushatë zgjedhore, por domosdoshmërisht do të duhej me qenë presidenti fuqiplotë i cili do ta përdorte atë autoritetin e vet për stabilitet politik”.

Periskopi: Pas gjithë situatës së krijuar prej Speciales e deri tani te vendimi i Kushtetueses, si e sheh Xhavit Haliti dialogun me Serbinë?

Xhavit Haliti: Mendoj që dialogu duhet të vazhdojë pa ndërpre derisa të arrihet një zgjedhje por pozicionimi i të dyja palëve kështu i palëkundshëm, është  i pamundur që ti qojë  këto bisedime përpara në ndërtimin raporteve ndërshtetërore, dhe pranimin e Kosovës nga ana e Serbisë. Unë mendojë që Kosova në këto rrethana, në  qoftë se Serbia  thotë  unë nuk e pranoj Kosovën në asnjë rast, dhe kryetari parlamentit e bën të njëjtën deklaratë, unë nuk e di pse duhet të bisedojmë në fund të fundit.

Periskopi: Qeveria Hoti sipas Xhavit Halitit…?

Qeverinë e kemi parë me shumë konferenca për shtyp, kemi parë juristë  që janë bërë doktor, e kundërta dhe kanë shprehur mendime për njërin tjetrin, për problemet e njëri tjetrit, dhe tjetër gjë nuk kam parë  që I është dhënë një shtytje zhvillimit të Kosovës.  Nuk e lë fajtor as Avdullah Hotin në fund të fundit sepse kaq ka pasur  mundësi, kaq e ka pasur fuqinë dhe o besojë që populli do të gjykojë se a duhet lënë vendin në duart e të paaftëve në duart e të paguximshmëve për ta çuar vendin përpara./Besarta Hoti/ Periskopi/