“Kemi gabuar, respektojmë zotimin e Hashim Thaçit” – Maqedonci reagon pasi i doli e plotë letra që ia shkroi KFOR’it

Ministri i Mbrojtjes, Ejup Maqedonci, ka reaguar pasi u publikua letra e 30 nëntorit 2024, ku Maqedonci zotohej se do ta respektojnë letrën e prillit të vitit 2013 ku atëherë Hashim Thaçi si kryeministër garantonte se FSK-ja nuk do të dërgohet në veri.

Një letër të tillë Albin Kurti e kishte cilësuar si “tradhti”, duke thënë se “ishte shokuar”, madje kërkonte nga Prokuroria të merrej me të.

Por, një garancë të tillë e ka dhënë edhe Ejup Maqedonci, ministri i Kurtit.

E ai ka reaguar në Facebook, duke thënë se letra nuk ishte rizotim, por sqarim i situatës së 24 nëntorit, kur Garda Ceremoniale ishte angazhuar në veri të vendit në një ceremoni mortore.

“S’ka rizotim, por sqarim Asgjë të re për publikun nuk paraqet letra dërguar Komandantit të KFOR-it për ngjarjen e 24 Nëntorit të vitit 2024, kur Garda Ceremoniale ishte angazhuar në veri të vendit në një cermoni mortore. Qëllimi i letrës së dërguar është sqaruar edhe më parë dhe ai mbetet i vlefshëm sepse është i vërtetë. Letra në fjalë është dërguar me qëllimin që t’i sqarohen Komandantit të KFOR-it rrethanat e angazhimit të një njësie të FSK-së në njërën nga komunat në veri të vendit, si dhe ta siguroj atë që nuk ka pasur për qëllim në asnjë rast tensionimin e situatës. Në asnjë mënyrë, letra nuk paraqet rizotim dhe nuk mund të interpretohet si rizotim, pasi për angazhimin e FSK-së në veri të Kosovës, ekziston një dokument në fuqi i dhënë si zotim nga ish-Kryeministri Thaçi në prill të vitit 2013, dërguar Sekretarit të Përgjithshëm të NATO-s, nga i cili derivojnë dhe kushtet e operimit e të koordinimit të FSK-së dhe KFOR-it për pjesën veriore të Kosovës”.

“E ritheksoj, ashtu siç e kam thënë në çdo paraqitje timen publike, që personalisht nuk pajtohem me atë zotim, pasi vazhdoj të mendoj se ka qenë zotim i gabuar dhe i dëmshëm për ushtrinë tonë, si dhe me pasoja afatgjata. Mirëpo ashtu siç e kemi deklaruar si Ministri e Mbrojtjes dhe si Qeveri e Kosovës, letrën zotuese të vitit 2013 do ta respektojmë, sepse jemitë përgjegjshëm karshi obligimeve të trashëguara institucionale për aq kohë sa janë në fuqi. Përgjegjësi e imja dhe e Komandantit të KFOR-it tani kur veçse ekziston zotimi i vitit 2013 i dhënë nga ish Kryeministri Thaçi, është që të sigurojmë njëri-tjetrin që do të bëjmë veprimet e nevojshme për të garantuar që angazhimi ynë ushtarak në veri të bëhet në mënyrë të koordinuar”, ka shkruar Maqedonci.