Kompania e dostit të zëvendësministrit rekomandohet për një kontratë 2.6 milionë euro

Ministria e Infrastrukturës ka bërë vlerësimin e ofertave për tenderin “Ndërtimi i Kyqjes në Autoudhën R-6 ,,Arbër Xhaferi në Viti”. Për kontratë është rekomanduar “Bujar Shabani B.I”, në një vlerë prej 2, 683, 200. 85 euro.

Në garë për këtë tender kanë qenë 7 kompani.

Pos tjerave, kriter kryesor ka qenë ‘çmimi më i ulët’, dhe kompania “Bujar Shabani” e ka plotësuar këtë kriter.

Kohëzgjatja e kontratës do të jetë 175 ditë (nga dhënia e kontratës). Por, mbetet të shihet nëse kontrata do të nënshkruhet më kompaninë e rekomanduar nga ministria, pasi sot është bërë njoftimi për dhënie dhe kompanitë do të kenë të drejtë ankese për pesë ditë kalendarike.

Zëvendësministri i Infrastrukturës, Hysen Durmishi, kishte thënë se e ka shok pronarin e biznesit ‘Bageri’, kompani që kishte fituar kontrata edhe më herët nga Ministria e Infrastrukturës.

“Unë Bujar Shabanin e njoh që nga viti 2001, e kam shok dhe ka pasur ndonjë periudhë kur unë nuk kam punu, nuk kam pasur ndonjë angazhim, pasi që kam dalë prej Komunës së Prishtinës, ku i kam ndihmu më shumë në kuptimin e organizimit kështu  si shok por asnjëherë nuk kam punu në kompaninë e tij. Thjesht e kam këshillu prej përvojës që unë e kam në menaxhim. Herë pas here kemi dalë me pi kafe dhe kemi diskutu si shokë”, kishte thënë Durmishi. /Periskopi/