Kryeministri Kurti u takua me ‘horrorin’ e çdo kryeministri dhe me katër sindikalistë tjerë
Kryeministri i Republikës së Kosovës, Albin Kurti, u takua sot me Rrahman Jasharajn e sindikatës së mësimdhënësve dhe me katër kryesindikalistët e tjerë.
Ky takim ishte paraparë për orën 10 të mëngjesit, dhe nuk dihet nëse është mbajtur me kohë. Pjesëmarrës thuhej se ishin kryesindikalistët nga Arsimi, Shëndetësia, Policia, Zjarrëfikësit dhe Dogana, përcjell Periskopi.
Në këtë takim pritet të diskutohet për kërkesën e tyre që në Ligjin për Buxhetin të parashihen mjetet për Ligjin e Pagave, i cili ndodhet në Kushtetuese.
Ligji i pagave është i pezulluar nga Kushtetuesja deri më 30 mars.
Të hënën, këto sindikata i kanë drejtuar letër Kurtit, ku kanë kërkuar takim urgjent me të rreth Ligjit të Pagave.
Kujtojmë që kryetari i SBAShK-ut, Rrahman Jasharaj, ka qenë fitues i çdo beteje sindikale që ka pasur në vitet e fundit me kryeministrat e Republikës së Kosovës duke e përdorur levën e grevës masive të mësimdhënësve për t’i realizuar kërkesat e tij.
Por, së fundi kryeministri Kurti bëri një reagim mjaft pozitiv për rastin duke kërkuar që të mendohej edhe për sektorin privat dhe duke përmendur rritjen alarmante të rrogave në sektorin publik. /Periskopi
