Kurti thotë se do t’i kërkojë ShBA-së dhe BE-së që t’i bëjnë presion Serbisë për ndaljen e çnjohjeve

Kryeministri Albin Kurti, ka reaguar ndaj lajmeve se Sierra Leone ka tërhequr njohjen e Kosovës. Megjithëse një gjë e tillë, ende nuk është konfirmuar zyrtarisht për Kosovën, ka qenë ministri i jashtëm serb, Ivica Daçiq, ai që ka thënë se ky shtet e ka çnjohur Kosovën.

Në shkrimin e tij që e ka publikuar në Facebook, kryeministri Kurti, thotë se ‘vullnetit të tij të mirë për heqjen e pjesshme të taksës, Serbia po i përgjigjet me intensifikim të fushatës së çnjohjes së Kosovës’.

Ai shkruan në Facebook:

Vullnetit tim të mirë, për heqjen e pjesshme të tarifës në lëndën e parë që importohet nga Serbia, në mënyrë që të krijohen kushtet për rifillim të dialogut dhe të ndërtimit të marrëdhënieve konstruktive të bashkëpunimit, qeveria serbe po i pergjigjet me intensifikim të fushatës së çnjohjeve së pavarësisë së Kosovës.

I bëj thirrje Serbisë zyrtare që ta ndalë këtë ofensivë dhe të heqë dorë nga politikat destruktive ndaj Kosovës dhe shtetësisë së saj. Po ashtu, do të kërkoj nga faktorët relevantë ndërkombëtarë, në radhë të parë ShBA-të dhe BE-ja, si ndërmjetësues në procesin e dialogut, ta shtojnë trysninë mbi Serbinë që ta ndërpresë politikën armiqësore ndaj Kosovës.

Ne kemi treguar qartë se e kemi vullnetin për marrëdhënie korrekte e normale me Serbinë. Mirëpo nuk mund të lejojmë që ky vullnet i yni të nëpërkëmbet.

Si kryeministër i Kosovës do të shqyrtoj me kujdes situatën e krijuar dhe do të veproj konform interesave të Republikës dhe qytetarëve të saj.