Ky ishte programi i Qeverisë Kurti për Energjinë: 4 vjet, dy paragrafë

Ky program nuk ishte publikuar deri në majin e këtij viti, përkundër që Qeveria ishte votuar në muajin mars derisa fituesi dihej prej mbrëmjes së 14 shkurtit.

Dhe megjithëse bëhet fjalë për një mandat të plotë, ose për katër vjet kohë, programi përmban vetëm 61 faqe. Për fat të keq, në këto programe nuk lejoheshin edhe poezi të ndryshme të kryeministrit Kurti, e të cilat me gjasë do ta rrisnin edhe numrin e faqeve.

Pjesa për Energjinë në Programin e Qeverisë për vitet 2021-2025 ka vetëm dy paragrafe. Po e përsërisim: pjesa për energjinë në Programin e Qeverisë Kurti për katër vjetë përmban vetëm DY PARAGRAFE.

Çka thuhet në to?

Në këto dy paragrafe nuk thuhet asgjë e re, duke qenë thjesht një përshkrim i detyrueshëm dhe tepër përgjithësues i qëllimeve mbi këtë sektor.

“Do të angazhohemi për krijimin e kushteve të favorshme për furnizim të qëndrueshëm e të përballueshëm me energji, për të gjithë qytetarët dhe ndërmarrjet e Kosovës, duke e pasur parasysh edhe ndikimin në mjedis.” – është fjalia e parë që shkruhet nga Qeveria jonë, raporton Periskopi.

Aty premtohet edh rritja e shumëllojshmërisë së burimeve energjetike, e po ashtu edhe rishikimi i Strategjisë së Energjisë.

Në këto fjali përmendet edhe qëllimi i “dekarbonizimit energjetik” e që vazhdon ta mbajë Qeverinë të dyzuar mes rritjes së kapaciteteve energjetike me thëngjill.

Po ashtu, Qeveria në program premton edhe “shqyrtimin e fizibilitetit të të gjitha mundësive për zhvillimin e sistemit të gazit natyror,”

Nuk dihet nëse ky shqyrtim i premtuar kishte të bënte me projektin amerikan të tubacionit të gazit, për të cilin po kritikohet ashpër kryeministri. /Periskopi