LDK kundër protestave të Vetëvendosjes: Nuk i bëhemi bisht askujt

Zyrtari për media i Lidhjes Demokratike të Kosovës, Besian Mustafa, në një deklaratë dhënë Periskopit ka konfirmuar qëndrimin e nënkryetarit të kësaj partie, Agim Veliu, se nuk do t’i bashkohen protestave masive, të paralajmëruara nga Lëvizja Vetëvendosje për rrëzimin e Qeverisë Haradinaj.

Mustafa ka thënë se qëndrimi i Veliut, është qëndrim zyrtar i partisë.

Derisa është pyetur për deputeten Osmani, Mustafa sërish ka përsëritur qëndrimin e mëhershëm se Veliu si nënkryetar është kompetent të jap qëndrimin e partisë për këtë çështje.

E, nënkryetari i kësaj partie, njëherësh kryetar i Komunës së Podujevës, Agim Veliu në një deklaratë të dhënë për media pak më parë ka thënë se LDK nuk do t’ju bashkohet protestave të Vetëvendosjes.

“Jo nuk i bashkohemi protestave të tyre, se nuk i bëhemi bisht askujt. Ne e kërkojmë rrëzimin e Qeverisë po jo me këto metoda, këto metoda nuk janë të pranueshme”, ka thënë Veliu, i cili nuk sqaroi tutje se çfarë metodash do të përdorë partia e tij për rrëzimin e kësaj Qeverie.

“E kemi pas idenë, po Vetëvendosja u nda me shokët e tyre, po i përkrahin Qeverinë kur po kanë nevojë dhe momentalisht nuk ka vota të mjaftueshme”, përfundoi Veliu.

Ndërsa, sa i përket protestave të paralajmëruara nga Vetëvendosje, deputetja Vjosa Osmani, tha se partia e saj nuk do protesta të dhunshme, por paqësore.

“LDK është partia e parë që ka protestuar që nga koha kur kundërshtonte regjimin e Millosheviqit. Ne jemi pro organizimeve në masë. Por assesi nuk jemi për protesta të dhunshme me gaz lotsjellës e mjete të tjera”, ka thënë Osmani në T7.

Kryetari i Vetëvendosjes, Albin Kurti në një konferencë të mbajtur për media gjatë ditës së djeshme paralajmëroi protestë masive kundër kësaj Qeverie dhe dërgimin e vendit në zgjedhje të reja.

Protestave, do t’ju paraprijnë tubimet me qytetarë në komuna të ndryshme, të cilat kanë nisur sot nga VV në Vushtrri./PERISKOPI