Një muaj paraburgim ndaj shoferes që goditi për vdekje 26-vjeçarin në Prishtinë

Kjo është konfirmuar për Reporteri.net nga zëdhënësja e kësaj gjykate, Mirlinda Gashi.

Në kërkesën e paraburgimit të Prokurorisë janë zbuluar edhe rrethanat se si ka ndodhur gjithë tragjedia në rrugën “Agim Ramadani”.

Sipas kërkesës për paraburgim e dyshuara duke drejtuar makinën në mënyrë të pakontrolluar, ka goditur shtyllën e semaforit dhe semafori pas rrëzimit e godet këmbësorin SH.H, i cili si pasojë e lëndimeve vdes në vendin e ngjarjes.

“Me të arritur përballë Ministrisë së Arsimit te semafori, e njëjta duke vazhduar në mënyrë të pakontrolluar dhe me pjesën e përparme të automjetit godet shtyllën e semaforit dhe nga goditja semafori rrezohet dhe godet këmbësorin SH.H, me çka tani të ndjerin i ka shkaktuar lëndime të renda trupore, ku si pasojë e lëndimeve, tani i ndjeri ka ndërruar jetë në vend të ngjarjes”, përshkruhet në kërkesën e Prokurorisë.

Gjatë ditës së sotme, kur dhe iu dha lamtumira e fundit 26-vjeçarit, familja Habibaj nga Deçani i fali gjakun familjes Berisha-Kllokoqi.

Familjarët e 26-vjeçarit që vdiq nga aksidenti në Prishtinë ia falin gjakun familjes së të dyshuarës që shkaktoi aksidentin