Non-paperi i jep Autonomi serbëve të Veriut, i merr Pavarësinë Kosovës (Teksti)

Non-paperi i jep Autonomi serbëve të Veriut, i merr Pavarësinë Kosovës (Teksti)

Një tjetër non-paper është publikuar në media, dhe i cili pretendon se paraqet një nismë gjermano-franceze për t’i dhënë fund Dialogut për Normalizimin e Marrëdhënieve mes Kosovës dhe Serbisë. Por, i cili është skëterrë i zi për të ardhmen e vendit tonë.

Në këtë non-paper si kryenegociatorë të palëve përmenden Aleksandër Vuçiq nga Serbia dhe Albin Kurti nga Kosova.

Kërkesa më shqetësuese është që Kosova të themelojë Distriktin Autonom të Veriut të Kosovës” dhe i cili do të përfshinte një pjesë të madhe të territorit të Kosovës.

Në mënyrë të hapur e të qartë, non-paperi në fjalë i jep pushtet ekzekutiv këtij Distrikti Autonom, praktikisht duke i dhënë mundësinë që të cenojë shtetësinë e Kosovës, shkruan Periskopi.

Në këtë Distrikt Autonom do të hynte Zveçani me 35 fshatra, Leposaviqi me 72 fshatra, Zubin Potoku me 63 fshatra dhe Mitrovica e Veriut.

I gjithë procesi dialogues sipas këtij non-paperi duhet të përfundojë deri në shkurtin e vitit të ardhshëm.

Çka merr Kosova?

Asgjë. Askund në këtë non-paper nuk thuhet se Kosova do të marrë njohjen ndërkombëtare nga Republika e Serbisë, por vetëm që “do t’i respektohet pavarësia dhe sovraniteti” brenda kufijve ndërkombëtarë.

Po ashtu, aty kërkohet që Kosova të mos vendos barriera tregtare ndaj Serbisë [Reciprociteti, taksa], ndërsa po ashtu kërkohet nga Serbia – merreni me mend – që të “respektojë status quo-në sa i përket pranueshmërisë ndërkombëtare të Kosovës. Me fjalë të tjera, që të mos lobojë për çnjohje të reja.

Si do të funksionojë ky Distrikt Autonom?

Edhe kjo është menduar nga non-paperi i publikuar. Aty thuhet që Disktrikti Autonom do të ketë Guvernator [ekuivalent i kryeministrit të Kosovës], Kuvend dhe Këshill Ekzekutiv [e në të cilin edhe formalisht do të lejohet të marrë pjesë Serbia.

“Distrikti Autonom i Veriut të Kosovës duhet të ketë Guvernatorin e tij që do të përfaqësojë Qeverinë e Kosovës, Kuvendin që do të përfaqësojë popullin, dhe Këshillin Ekzekutiv që do të jetë organ i përbashkët i Distriktit Autonom, Qeverisë së Kosovës, Qeverisë së Serbisë dhe Bashkimit Evropian”. – thuhet në këtë non-paper.

Tjetër?

Non-paperi propozon edhe krijimin e një Zone Ekonomike të Mitrovicës për të nxitur zhvillim më të madh ekonomik në këtë pjesë.

Dhe natyrisht, meqë “Kushtetuta nuk është as Bibël e as Kuran”, aty ndodhet edhe kjo fjali tmerruese:

“Të dyja palët duhet të bëjnë ndryshime kushtetuese dhe legjislative për t’u siguruar që të zbatojnë marrëveshjen e detyrueshme ligjore [mes tyre].”

Kujtojmë se Emisari i Posaçëm i BE-së për Dialogun, Mirosllav Lajçak – i përmendur edhe në non-paper – kishte inkurajuar një gjë të tillë duke thënë se Kushtetuta nuk ishte libër i Shenjtë.

Si kanë reaguar Franca me Gjermaninë?

Më herët gjatë ditës, Gjermania e ka quajtur “fake news” [lajm të rremë] non-paperin e publikuar.

Ndërkohë, tashmë edhe Franca është distancuar nga një gjë e tillë.

Sidoqoftë, ajo që mund të konstatohet është se pozicioni i Kosovës në dialog me Serbinë është tashmë shumë më i vështirë se që ishte dikur. Për herë të parë, bëhet një propozim që nuk i jep Kosovës asgjë, e madje i shkel rëndë Pavarësinë, ndërsa i jep serbëve të Kosovës Autonomi. /Periskopi

Shpërndaje në: