Po bëhet gati: Merret vesh ku do të strehohen afganët që vijnë në Kosovë?

Kosova ka shprehur gatishmërinë për strehimin e afganëve që po ikin nga pushteti i talebanëve në Afganistan. E, Qeveria e Kosovës, para dy ditëve ka marrë vendim për mbrojtjen e përkohshme për kontraktorët afganë të cilët punojnë për NATO, por nuk ka treguar se ku do të strehohen.

Periskopi merr vesh se afganët e ardhur në Kosovës fillimisht do të strehohen në kampin e KFOR-it, në Bondsteel, që gjendet në Ferizaj.

Burimet të Periskopit brenda kampit bëjnë të ditur se ka filluar përgatitja e hapësirave për strehimin e refugjatëve dhe se janë duke punuar me intensitet të madh. Gjithashtu, ky kamp ka kërkuar edhe punëtorë të rinj në mënyrë që të përfundojnë sa më parë përgatitjet.

Deri më tani nuk dihet se sa do të jetë numri i afganëve që do të strehohen në Kosovë derisa presin që procedurat për banim në Shtetet e Bashkuara të Amerikës.

Ndërkohë, Qeveria e Kosovës para dy ditëve ka miratuar kërkesën e Ministrisë së Punëve të Brendshme, për dhënien e mbrojtjes së përkohshme dhe të menjëhershme personave të rrezikuar nga konflikti i brendshëm në Afganistan.

Qeveria e vlerëson të nevojshëm ofrimin e mbrojtjes së përkohshme e të menjëhershme personave të rrezikuar nga konflikti i brendshëm.

“Këta persona do t’i nënshtrohen procesit të verifikimit nga institucionet relevante të sigurisë në Republikën e Kosovës, në rast të nevojës e në qëllim të sigurisë kombëtare, sipas vlerësimit të institucioneve relevante në Republikën e Kosovës”, thuhet në komunikatë.

Sipas njoftimit të Qeverisë, gjatë kohës së qëndrimit në Republikën e Kosovës do të veprojnë në përputhje me legjislacionin në fuqi dhe do të gëzojnë të drejtat e përcaktuara sipas Ligjit për Azil./Periskopi/