8 orë më parëRama “ngacmon” Macron-in: Harrove të na urosh për paqen me Azerbajxhanin që bëri Trump
Periskopi(8 muaj më parë)
(8 muaj më parë)Kryeministri Edi Rama i ka nisur me nota humori takimet në margjinat e Samitit të Komunitetit Politik Evropian (EPC) në Kopenhagë, duke iu referuar një ngatërrese të presidentit amerikan Donald Trump, i cili së fundmi përmendi gabimisht një “konflikt Shqipëri-Azerbajxhan”. Në një bisedë me presidentin francez Emmanuel Macron, Rama tha me shaka se Franca duhet […]
Në një bisedë me presidentin francez Emmanuel Macron, Rama tha me shaka se Franca duhet të kërkojë ndjesë, sepse nuk e ka uruar Shqipërinë për një marrëveshje paqeje me Azerbajxhanin – një marrëveshje që, sipas “versionit” të Trump, ishte ndërmjetësuar nga vetë ai.
“Duhet të na kërkoni falje që nuk na uruat për marrëveshjen e paqes që Presidenti Trump bëri mes Shqipërisë dhe Azerbajxhanit. Ai punoi shumë për këtë”, tha Rama, raporton AP, transmeton Periskopi.
Ngatërrimi i Trump – që në vend të procesit të paqes Armeni-Azerbajxhan përmendi Shqipërinë – ka bërë xhiron e rrjeteve sociale.
Gjatë një interviste të gjatë në emisionin “Fox and Friends”, presidenti amerikan pretendoi se i kishte dhënë fund luftës midis Azerbajxhanit dhe Shqipërisë – dy vende që, për habinë e të gjithëve, nuk kanë qenë kurrë në luftë me njëra-tjetrën.
Kjo ishte hera e dytë që Trump bën të njëjtën gafë. Në gusht, gjatë një interviste në “Mark Levin Show”, ai përmendi “paqen mes Azerbajxhanit dhe Shqipërisë”, ndërsa në fakt i referohej konfliktit në Nagorno-Karabakh mes Azerbajxhanit dhe Armenisë./Periskopi/
