Shanë lart e poshtë, tash s’i shplojnë: Glauk Konjufca me veprime ‘ShIK-u’ për muralet në Kuvend

“Skënderbeu”, “Lidhja e Lezhës” dhe “Lidhja e Prizrenit”, janë tri nga muralet e vendosura në vitin 2004 në hollin e Kuvendit të Kosovës. Mirëpo janë bërë 17 vite prej që këto murale nuk janë mbuluar dhe nuk dihet se çfarë do të ndodhë me to.

Në kohën kur Kuvendi i Kosovës, udhëhiqej nga ish-kryetari Kadri Veseli, deputetët e opozitës së atëhershme kishin zbuluar këto murale, por të cilat ishin mbuluar menjëherë nga ana e Kuvendit, raporton Periskopi.

Tani kur Kuvendi është në ‘zotërim’ të njeriut të Vetëvendosjes, Glauk Konjufca, këto murale me motive kombëtare po vazhdojnë të qëndrojnë të mbuluara.

Glauk Konjufca dhe partia e tij më 2015, sa ishin në opozitë, zbuluan këto murale të cilat u patën zëvendësuar me disa të tjerë dhe mbuluar prapë dhe po qëndrojnë të mbuluara edhe sot.

Atëbotë, Vetëvendosje pati lëshuar komunikatë për këto murale, në të cilën s’patën lënë gjë pa thënë në drejtim të kryetarit të asokohe, Kadri Veselit, shkruan Periskopi.

Në reagimin e Vetëvendosjes, thuhej se Kadri Veseli turpërohej nga historia kombëtare, prandaj ka vendosur t’i mbulojë sërish ato.

“Kur të gjithë po festonin fitoren e madhe të Kombëtares, Veseli, sikur UNMIK-u më herët, i mbuloi muralet që shfaqin momentet më të rëndësishme kuvendore të historisë, për të mos e zemëruar Beogradin zyrtar”.

Vetëvendosje, në reagim, ia ka kujtuar Kadri Veselit kohën e ShIK-ut, duke thënë se po bën çmos për ta përmirësuar imazhin e tij.

“Trashëgiminë e Shefit të ShIK-ut është munduar ta shpërlajë me paraqitjen e tij prej një kryetari jashtëzakonisht të kujdesshëm të Kuvendit. Por, Veseli i vërtetë mbetet ai i ShIK-ut, shefi i punëve të fshehta, ai i vendimeve dhe veprimeve sekrete”.

Periskopi ka provuar të marrë një përgjigje nga Kuvendi i Kosovës lidhur me këto murale, mirëpo deri më tani nuk kanë kthyer përgjigje.

Nuk dihet nëse edhe kryetari aktual i Kuvendit, Galuk Konjufca ‘po turpërohet nga historia kombëtare’./Periskopi/