Shëndetësi e mjera Shëndetësi: Rifat Latifi me disa deputetë, tallen e qeshen teksa flasin për problemet e shëndetit mendor
Ministri i Shëndetësisë Rifat Latifi, i cili po kritikohet gjithanshëm se nuk është që po lë shenjë në detyrën që ka marrë pas Arben Vitisë, dje pati një deklaratë skandaloze në Komisionin për Shëndetësi, ku ishte i ftuar të raportonte. Bashkë me të, skandalozë ishin edhe disa prej deputetëve – anëtarë të Komisionit, që qeshën dhe stërholluan kontekstin e hidhur të deklaratës skandaloze të njeriut që është Ministër.
Kështu, fjala është për një deklaratë të Rifat Latifit, se e ka vizituar Klinikën e Psikikatrisë – e ku kujdeset të thotë ‘jo si pacient’ – duke stigmatizuar automatikisht pacientët që kanë nevojë për trajtim rreth shëndetit mendorë. E pas kësaj, pasojnë shakatë dhe plasë e qeshura turpëruese e deputetëve me këtë deklaratë.
“Kam vizitu shumicën e spitaleve rajonale. Kam vizitu shumë komuna, shumë qendra familjare nëpër rreth Kosovës. S’kam mbërri tana me i pa. “Kam qenë një ditë në Psikatri, jo si pacient (plas e qeshura), por si ministër, me iu thanë të drejtën, ju kisha lutë ju të gjithë deputetëve shkoni në Psikatri, me e pa …(qeshet ministri, qeshen deputetët)”, thotë Latifi, përcjell Periskopi.
Ministri tutje e trashë humorin e tij tepër të zi:
“Shkoni si vrojtues, si doktora, si qytetarë, si reprezentues në Parlamentin e Kosovës”, thotë ministri, përcjell Periskopi.
Momenti i deklaratës, në videon e mëposhtme nga minutat: 1:12:20
Lidhur me këtë, ka pasur reagime të shumta në rrjetet sociale.
Opinionistja Kimete Berisha, elaboron kështu deklaratën skandaloze, në një status të gjatë në Facebook, por që ne po e sjellim këtë pjesë:
“Tha: ‘kam shkuar në Psikiatri’, mo Zot si pacient, po si ministër.
Demek, është turp të kesh probleme mendore.
Besa, qeshën krejt deputetët.
Ata nuk e dinë se – Njeriu më i mirë vuan më së shumti.
P.S. Shih çka konsideron sukses ministri i shëndetësisë: Që e ka vizituar Psikiatrinë.
Nuk po i pranon kurrkush në vizita, edhe pak kanë me ia nis me lajmet:
‘Ministria e Drejtësisē e Kosovës e vizitoi Ministrinë e Industrisë së Kosovës”, thotë opinionistja Berisha.
Përveç Berishës, reagime nëpër rrjet, ka plot edhe nga gazetarët e opinionistë të tjerë.
Për Bind Sejën, drejtor ekzekutiv të Qendrës për Informim dhe përmirësim Social, sipas një deklarate që e lexuam në Nacionale, ministri Latifi e ka stigmën të përbrendësuar, që fillin e ka nga mendësia arkaike.
“Ministri së pari vetë e ka këtë stigmën të përmbrendsume, ku nihet i obligumë me kallxu që nuk po iu thotë me shku si pacientë atje; shumë koment nënçmues, dhe e panevojshme me u cekë”, tha ai.
Në dorë të kujt është shëndetësia kosovare, kështu?/Periskopi