Vetëvendosje nuk pranon të debatohet në Kuvend për të gjeturat e raportit të DASH-it
Me 26 vota PËR, 40 KUNDËR dhe 1 Abstenim, është rrëzuar kërkesa e PDK-së për debat parlamentar për të pagjeturat e raportit të DASH-it.
Shefi i Grupit Parlamentar të këtij subjekti, Abelard Tahiri ka thënë se PDK kërkon që të futet në rend dite një debat parlamentar për të gjeturat e raportit të Departamentit Amerikan të Shtetit.
“I kërkoj seancës të plotësoj rendin e ditës me mocion përmbajtjesor. Ne kërkojmë debat parlamentar me të gjeturat e raportit të DASH-it. Ka të gjetura mjaft shqetësuese për qeverinë dhe institucionet e Kosovës”, tha Tahiri.
Megjithatë, një kërkesë e tillë nuk u pranua nga Lëvizja Vetëvendosje.
Vlen të theksohet se Raporti i DASH-it për vitin 2023 ka një përshkrim tejet të keq për Qeverinë.
Aty ndër shumë të tjera thuhet se Qeveria e Kosovës nuk e ka zbatuar ligjin në mënyrë efektive për korrupsion në Qeveri.
“Ligji parashikon dënime penale për korrupsion nga zyrtarët, por qeveria nuk e zbatoi ligjin në mënyrë efektive. Pati raportime të shumta për korrupsion në qeveri. Zyrtarët ndonjëherë përfshiheshin në praktika korruptive pa u ndëshkuar. Mungesa e mbikëqyrjes efektive gjyqësore dhe sundimi i dobët i ligjit në përgjithësi kontribuuan në këtë problem. Rastet e korrupsionit i nënshtroheshin rregullisht apelimeve të përsëritura dhe sistemi gjyqësor shpesh lejonte skadimin e parashkrimit”, thuhet në pjesën për korrupsionin të këtij raporti.
